Alüminyum Hurda Geri Dönüşüm

Letra avyerta a los lektores

En vezes, keridos amigos, me kesho de no topar kualo eskrivir, i avlo de aki de aya. Afita en vezes, a la kontra, kozas ke kedan mankas en mis artikolos achakes del espasyo limitado. No me parese djusto de abuzar del derecho de las otras amigas. Por modo de esto, en la pajina de “El Amaneser” me permeto de eskrivir sujetos mas largos. Oy, vo retornar a un artikolo miyo de antes 3,4 semanas, de esta mizma oja.

En el 4 de Junio eskrivi sovre un livro en Judeo-Espanyol. Livro eskrito por Sara Benveniste Benrey i publikado en el 1996 en Israel, yamandose djustamente “Espertando el Judeo-Espanyol”. Lo meldi en kurto tyempo porke reelmente esta muy byen imprimado i fasil al meldar. Apenas vine al final, ampesi a tener dubyos, o “puntos de interrogasyon”, mas egzaktamente...

La alkunya Benveniste, i el fakto ke la eskrivana bivyo en Estambol asta 1969... Lo mas importante, la dedikasa (ithaf) a sus ijos Yossi i Dolly, i enfin la foto de la autora ke kedi mirando un largo momento. Naturalmente es una foto de los anyos mas maturos (olgun), i no de los anyos 60. Solamente, el Benrey me izo ezitar. Ma, pensi ke esto no tyene muncha importansa, i por siguro avra una eksplikasyon lojika.

Me dishe, estos todos indisyos (kanıtlar) no pueden ser azardos (tesadüf). Bushki en el Internet, un adereso elektroniko... bushki personas ke me pudriyan responder. No topi nada. Solamente, en el livro, para enkomendarlo, ay un adereso en Hertzliya, i nombre del ijo. No me parese etik revelar este adereso syendo ke dayinda no esto sigura de syertas kozas konsernando mi konosensya kon la eskrivana...

 

En el presipyo de 1960 ampesimos a ir a la İsla Burgaz. Si no me yerro, en akeyos anyos, Sara Benveniste tambyen estava ayi kon su famiya. Me akodro muy byen de la ija Dolly, finika, morenika kon kaveyos pretos... Kon la Sra. Benveniste sin tener relasyones partikolarmente estrechas, mos saludavamos, avlavamos en enkontrandomos. Porke, en fin de kuento eramos kaji vezinas. Ma no se si eya se akodra de mi. Esto todo lo esto eskrivyendo malgrado mi insertitud (kuşku). Pensi ke oy, el “Şalom” se va i a los abonados de “El Amaneser”. Puede ser algun lektor konosyendo la famiya Benveniste, ke probavlemente bive o bivyo en Hertzliya, puede responderme.(*)

Esto no lo kero unikamente para mi o para satisfazer mi kuryozidad. Despues la publikasyon de mi artikolo, enkontri a una muchacha ke, ya mos konosimos mas entes en syertas okazyones. Me demando informasyones sovre la famiya Benveniste ke izo Aliya kaji antes 40 anyos. Al pareser son mishpaha i no tuvyeron dingun remedyo de kontaktarlos asta oy. Naturalmente me desplazyo de no pueder darle dingun indisyo, syendo ke i yo no konosko nada (por la ora) sovre estas personas.

En terminando mi letra, kero ekspresar otruna vez mi esperansa de resivir alguna repuesta pozitiva ke puede ayudar la prezumada mishpaha de los Benveniste. Esto me va dar tambyen la asiguransa ke no me yerri en konfiandome a mi memorya. Suetando de toparmos en otro moabet, enveranada alegre a todos...

(*)-Me puedesh mandar mesaje a mi nombre, a el adereso elektroniko del “Şalom” o “El Amaneser”. O simplemente un telefon si estash en muestra sivdad.

Ya me avizan a mi. C.D.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın