“El Iftar”, i la kareza de la saviduriya

Silvyo OVADYA Köşe Yazısı
15 Haziran 2016 Çarşamba

La semana pasada meldimos mizmo en las gazetas Israelyanas “el Iftar” ke fue ofresido por la Komunidad Djudia en Andirne. Anyos i anyos la Komunidad Djudia organizo Iftares en el Sentro Kultural de Neve Şalom a sheshentas invitados de ministros asta mayores, de governadores a prezidentes de munchos NGO’s (Institusyones de Komunidades Siviles); i munchos invitados eran prontos a partisipar a estos Iftares (komida ke se kome en el mez de Ramadan ande los Musulmanos azen tanid trenta dias). Komo era un pranso ande munchas personas eran prontos, todos los partisipantes tenian posibilidad de renkontrar personajes importantes – de alto nivel. En enverano, no es muy fasil de azer tanid trenta dias. Oy el tanid se eskapa serka de la mueve de la tadre. Ya se ke es mijor de la Ingleterya porke aya la ora para kortar tanid es dospues de las diez de la noche. Los muzulmanes tyenen un kalendaryo de tresyentos i sinkuenta i sinko dias al anyo. I kada anyo fiestan las fiestas diez dias mas antes. I kada trenta i sinko anyos, la mizma fiyesta se fiyesta en  la mizma data. Unos kuantos anyos antes, muestro Prezidente İbrahimzadeh dio karar de no azer mas estas fortas i desidio de dar pransos a los menesterozos muzulmanos ke biven en el Darülaceze - lugar fondado en el tiempo del Imperio Otomano i ke da ayudo a sienes de djente aedada i menesteroza. En la fondasyon de Darülaceze se topa una meshkita, una iglesia i un midrash para los djudios. Oy en diya kreo ke ay solo un djudio ke bive aya ma esto es el djesto del tiempo del Imperio. Ay dos anyos ke trokimos de  karar i organizimos este iftar en Edirne, sivdad ande dospues de la avyertura por la segunda vez de la Sinagoga tiene una grande emportansa por muestra Komunidad. I este anyo, delantre de la sinagoga, avia mil Edirnelis ke vinieron a partajar la komida ofresida por la Komunidad Djudia. I delantre de la Meshkita de Selimiye (Meshkita renomada fraguada por el Arkitekto Sinan i ke es protejada por el UNESCO) ofresimos otros ochosyentos pransos por los menesterozos ke azen tanid. Esto kada diya es finansado por una kompanyiya komersiala o por una fondasyon o asosyasyon. I esto reelmente es apresiado por el puevlo i por los diridjentes de esta sivdad.

Tenia otros sujetos a tratar oy ma el segundo punto ke kero diskutir es ke todo editor es  libero de vender sus livros al presyo ke le gusta. Ma kreo ke esto no es muy djusto si este presyo es dos o tres vezes mas karo de los asemejantes. (Ken puede dizir la valor de un livro de istoria por egzempyo ke fue realizado dospues de un alay de bushkedades!!!) Ya se ke no es muy djusto de dar nombres ma dos mezes antes merki un livro en 13,5 X 21,0 de 145 ojas; 101 ojas de artikolos i 44 ojas de fotografias de dokumentos i la bibliografia.  Malorozamente merki este livro por 35 dolares (100 liras turkas). El livro era imprimado en ojas de paja (saman kağıdı). Era un livro enteresante i lo meldi en dos dias. La semana pasada, la responsavle de la livrera del Şalom, Gila, me bushko para demanderme si estava enterasado para merkar un livro ke save ke me enteresa. No le demandi mizmo el presyo. I kuando lo resivio, me demando ande lo keriya. Tuvi la oportunidad de demandarle el presyo i me respondyo 200 liras turkas (70 dolares Amerikanos). I le dishe ke no keria merkarlo porke estava muy muy karo. I reelmente es un livro ke me enteresa muncho. Si un editor kere vender su livros a presyos reelmente egzajerados, esta limitando la dispersyon de la sensia. Ya lo puede azer; ma penso ke reelmente no es djusto.

En unos kuantos diyas, vamos a publikar una seria de livrikos en Judeo-Espanyol ke fueron imprimados en los anyos 1930 en muestra sivdad i ke son istoryikas de amor. Vos prometo ke estos livrikos no van a tener un presyo egzajerado, ma a la kontra, bastante barato para ke todos lospuedan merkar i gozarsen de la lektura.