Un dia de Alhad en ‘şile’

Un dia de  Alhad en ‘şile’

Alhad ultimo mos fuimos a ‘Şile’ a la kaza de unos paryentes ke mos envitaron de demanyana.

Şile es, un distrikto (ilçe) de Estambol ke se topa en la rejyon (bölge) de la mar Marmara, i en el bodre de la mar Karadeniz. En el bodre de la mar Karadeniz, la popülasyon es muy grande.

Şile es una de las primeras munisipalitades (belediye) kreadas kon la fondasyon de la republika.

El ochenta por syen es entornada de sharas (orman) yena de vedruras i arvoles. Oy orozamente es uno de los lugares ande se puede respirar un aver limpyo, porke en la sivdad no se esta puedyendo respirar a kavza de las fraguas ke se estan konstruizando de 30 a 40 etajes.

En este distrikto ay munchas plajes naturales (doğal plajlar), en el bodre de mar de 60 kilometros. La mar es un poko perikoloza kon munchas olas (dalga). 

El ke no save nadar no kale ke entre a esta mar porke a la fin munchos mansevos se estan aguando en esta rejyon a kavza de no saver nadar i de alesharsen del bodre.

El Fener de Şile; se konstruizo en 1859, tyene un pasado de 150 anyos. Agora se retorno (dönüştü) a un muzeo, es una ovra istorika emportante ke dyo servisyo entre la mar Karadeniz i el estrecho (İstanbul Boğazı) de Estambol.

Ay munchas ovras istorikas en Şile i las kazas son de tavla.

Las kazas son de dos etajes i ay 150 kazas de tavla ke ainda no se repararon.

Enfin a las 11 de la demanyana ayegimos a una kaza de çiftlik en un terreno muy grande.

La meza yena de kozas savrozas, preparadas por la balabaya, una meza ordenada kon muncha atansyon i kerensya…

Mos asentimos a las 11 i fina las dos de midi; komimos, bevimos çay, avlimos, kantimos i riyimos…

Despues salimos a azer un torno, a vijitar el terreno ande aviya 15 vakas, 20 gayos, perros, pasharos i todo el terreno yeno de legumes i frutas. Tomates, pipinos, pipirushkas, ispinaka, melones, fragulas, karpuzes todo ensembrado kon un orden ekstraordinaryo. Todo lo ke komimos todo organik muy savrozo.

La manteka, el kezo, los vuevos freskos, el kaymak, mizmo la agua ke bevimoz estava savroza.

Los arvoles de igos, de prunas todos en el entorno de una pisina yena de agua de luvya para arufyar todo lo ensembrado (ekilmiş). En el bodre de mar una arena fina, el puevlo entrando a la mar, las rozas multikolores, el kamino golyendo al miskle, las personas kon karas riyendo, saludando a los pasajeros lo ke no kedo mas malorosamente en la sivdad.

Enfin, tornimos a kaza para bever el kafe en la tarasa enfrente de la mar. Mos repozimos un poko i salimos para iyir al sentro de Şile i konoser el bazar.

En primero mos fuimos al lado del Fener de Şile famoso, i de aya kontemplimos (seyretmek) la vista entre los pinyaskos (kayalık), la kolor de la mar kon las kolores del vedre de los arvoles. El bodre de mar yeno de oteles muevos, el bazar kon munchos magazenes sovre vistidos de enverano, djugetes, lugares de komer, resstorantes, patiseriyas, kafes i dondurmacis…

Entrimos a un kafe enriva de la mar i observimos la echadura del sol (güneş batışı) kon unas kolores briyantes.

Konversando komimos, i kansos del dia entero del aver limpyo mos metimos al kamino para tornar a muestra kaza.

Pasimos un dia muy reushido kon el tyempo tivyo i kon los amigos kerensyozos…

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın