Aktos Kulturales

La semana dalkavo malorozamente el sujeto era la disparisyon de muestro ermano, Sami Herman. Vos kero dizir ke su mujer Suzet, ke el Dio le de pasensya,  es una persona ke tiene un talento eksepsiyonel para muestra lingua, el judeo-espanyol. Dospues de un sierto tiempo puedeser ke se va konsolar okupandose kon muestra lingua. Komo tenemos de menester de personas ke deven de edukar los ke son enteresados a ambezar el djudezmo vamos a topar siertos enamorados de esta lingua.

La semana pasada, kuando mos fuimos a Andirne para una boda ke se realizo kuarenta i un anyo dospues; tuve el mazal de estar kon el Artisto (reelmente es un artisto eksepsiyonel) İzzet Keribar ke travo siertas fotografias. Kuando me embiyo serka de vente entre eyas, reelmente eran fotografias eksepsyoneles. En el kamino avlando kon el, mos konto ke le demandaron kualo es su rolo para travar fotografias kuando los telefones travan tanta maraviyas. I el Sinyor Keribar les respondiyo: “Lo ke se trava kon los telefones son  fotokopias; lo ke travamos mozotros es Fotografias”. Reelmente ya puedesh ver la grande diferensia entre una fotografiya travada por una persona i otra por un artisto komo İzzet. No topi el tyempo para rengrasyarlo ma le va telefonar en dizyendo ke reelmente tiene un talente ke no se fada a todos.

Dos semanas antes viaji solo dos dias a İsrael. Ay dos anyos ke azemos un viyaje kon mis amigos de manseves para vijitar un amigo ke bive en İsrael i ke mos aspera kon grande eskarinyo. I en tornando el mas grande plazer es de merkar CDs en el aeroporto porke no topash mas botikas de CDs en la sivdad. Tuve el plazer de merkar el CD de Ester Rada ke mos dio un konserto en el Yom Atsmaut en Estanbol; el segundo era un CD de Giora Feidman ke mos izimos amigos dospues del konserto ke mos egzekuto en Andirne. I el treser fue el de David De’or, kantador eksepsiyonel ke kanta mizmo aryas de operas i su CD dalkavo es un lavoro sovre las psalmas (mezmur). Son kantes liturjikos. Oy le telefoni a İzzet Bana para demandarle si tiene este CD porke lo tiene de menester para las seremonias ke se realizan en muestra komunidad; i el komo es enteresado kon su echo lo prokuro kuando salyo… Es una idea de organizar en la ada en Yıldırım una nochada kon una komida – mangal i ligado (ciğer) a la manera ke se friye en Andirne kon un konserto de David De’or kon mas de kinyentas personas. Puedeser mizmo topar sponsores para realizar este evenimiento. Es a los dirijantes del klob i mizmo al dirijantes del kal de la Büyükada para desidar de azer un evenimiento semejante.

Para eskapar los evenimientos artistikos (sanatsal) vos kero avlar de una propozisyon. Un muzisyen ke es profesor koronado en Fransia i ke tiene serka de syen i vente enstrumentos asopladores (körüklü) komo el akordeon kere ser parte de un museo de enstrumentos muzikales. En eskriviendo esta propozisyon mi amigo Moris Levi me izo akodrar ke Selim Hubeş el gitaristo (!) de los Pasharos Sefardis tiene una ancha koleksiyon de Enstrumentos de Muzika. Reelmente este se puede realizar en una Sinagoga o una Eglisia Antigua ke no se esta empleando. I los Gregos fueron enteresados kon esto porke tienen bastantes eskolas ke no se uza oy en dia. En este muzeo, el ke poseda los enstrumentos esta pronto a dar eksplikasyones siertos dias de la semana. Ma mi idea es mismo de dar siertos konsiertos para ke sea el Muzeo de la Muzika i no “El Muzeo de los Enstrumentos de Muzika.

Vos auguro una enveranada klara yena de evenimientos orozos i yena de evenimientos kulturales i artistikos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın