El dia de las ‘madres’

El dia de las ‘madres’

08.05.2016 Un dia sakro para todos: El dia de las madres para el mundo entero.

“Ken es madre?”

Madre es el monumento de fuersa (güç abidesi), es una biva (canlı), ke menaja (idare etmek) a todos en su kaza i en su famiya, es un arvole de pasensya, lo mas emportante es la baza de la Kerensya, Pasensya Sakrifisyo i Devuamyento.

Las madres son sakras, son bendichas.

La kerensya de madre es el orijen (kaynak) de todas las kerensyas.

La madre es una persona ke puede aparejar su chanta kon el de su ijo en el mizmo tyempo,

- Eya puede asperar fina demanyana sus ijos en rezistyendo (direnmek) a su esfuenyo,

- Eya puede aprontar tres modos de komidas en una ora i la salata endjuntos, dandole a komer a su chiko en mizmo tyempo,

- Eya no se kesha mizmo ke se alevanta sinko vezes en una noche,

- Eya aspera fina la demanyana en la kavesa de su ija hazina,

- Eya yeva a kaminar a sus ijos para ke profiten del oksijen, del aver limpyo,

- Eya no aparta a sus ijos i syempre los toma debasho de sus alas (korumak),

- Eya pardona mizmo si esta muy triste,

- Eya es un Ancelo ke karesa los kaveyos de sus ijos en bezandolos i golyendolos,

- Kuando su ija va ser novya u su ijo novyo, kuando sus ijos seran diplomados (mezun olmak), kuando el ijo va echar un gol en el match de football, kuando su ijo se va iyir al servisyo militar, ampesa a yorar, porke eya pensa syempre a lo bueno de toda su famiya,

- La madre es una buena avokata. Mizmo si tyene una kulpa; eya te defende de aryento de su korason i lo aze kon muncha kreensa i konfiensa,

- Es una buena doktora, si te azes hazino, para pueder meterte empyes eya lavora kon toda su fuersa,

- Eya aze buena politika. En kaza eya dirija a todos,

- Eya es una buena psikologa. Da emportansa a los problemes i ayuda para pueder solusyonarlos (çözümlemek),

- Es una buena ekonomista. No vos desha solo kuando ay una problema,

- Eya mete pas (barıştırmak) entre los aravyados,

- Es una buena enjenyora (mühendis), aze planos para el den frente, i si se metyo una koza a la kavesa, kale ke lo aga, absolutamente eskapa lo ke va azer. Eya pena para reushir fina la fin,

- Es una buena gizandera. La savor de sus komidas tyenen un pasto espesyal. Dingunos no pueden gizar savrozo komo eya,

- Es una buena fam de menaj. Eya arekoje todo lo ke esta dezordonado, alimpya lo ke esta suzyo i lo lava,

- Eya mezura la kayentura de la boz del den frente,

- Es espesyalista de komidas, espesyalista de orden (düzen), savida, kultivada, persona ke kere byen a los ijos mas muncho de todo en la vida, persona devuada ke da su kerensya sin asperar nada del den frente,

- Es una persona ke asigura el ekilibro entre todos,

- Save kualo es la Kerensya i aksepta todo asegun es (olduğu gibi).

El manko de todo se puede inchir, ma el manko de una madre, nunka no se inche.

‘MADRE’ es la sola persona ke no se puede deskrivir kon los byervos.

Felisito a todas las madres, ke seygan syempre entornadas de sus famiyas.

Dyo ke no mos amostre la mankura de estos ‘Ancelos sin alas’ (Kanatsız melek) ke son muy presyozas.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın