La venida de la primavera

La venida de la primavera

Ya fyestimos Pesah, kon toda la famiya, en el entorno de una meza byen ornada, azyendo la Agada, kon muncha djente de edades diferentes.

Los chikos riyendosen i demandando kestyones sovre la fyesta, los grandes respondyendo i meldando la Agada.

El Dyo ke mos ayege para kada anyo!

La venida (geliş) de Pesah mos aze pensar, al invyerno ke ya se eskapo, i ke la primavera esta en la puerta. Pesah es el empisijo de los tyempos dulses.

En el primer dia de esta fyesta, en las sinagogas del mundo entero rogamos al todo el Puederoso ke mos de el rosiyo (çiğ), ke es el sembol de esta sezon.

La Primavera; es la sezon ke las inyeves empesan a dirritirsen, las luvyas pujan, las flores enfloresen en los kampos i la natura se aribive (canlanır).

Esto es la kavza de ser mas positivos i mas optimistos.

Los arvoles se envedresen (yeşermek), las ojas se aresfreskan, (tazelenir), todo el trokamyento de la natura es una egzaltasyon (coşku) para las personas, para ser mas aktivos i alegres.

Estambol es una sivdad mirakulosa ke no savemos la valor malorosamente.

El festival de las tulipes (laleler) empeso en la Arvoleria (koru) de Emirgan en Estambol.

Todas las rozas de kolores diferentes, estan kreendo una armoniya kon el tyempo puro i limpyo, golyendo la tyerra, i la natura kalma, estan dando el repozo a la persona.

La natura es la vida, es la vejetasyon (bitki örtüsü), es las rozas, es el aver...

La primavera es una sezon ke traye la felisidad (mutluluk) i el entuzyasmo (coşku) de bivir. En esta sezon tivya (ılık), las personas pueden profitar de las ermozuras de la natura, del sol ke melizina los romatizmos.

Los dias se empesan a alargarsen, los pasharos kantan kon sus bozes ermozas, las yervas freskas se engrandesen, el syelo es klaro, el sol briyando i la mar tyene una kolor blu (mavi) sin olas (dalga).

Esto todo aze sentir a la persona orozo de todo modo de evenemento.

Por enalteser en la primavera muestra enerjiya; kale echar tino a lo ke estamos komyendo i bevyendo. Komeremos mas muncho zarzavat i fruta, i beveremos mas muncha agua.

Kale apersivirse (fark etmek) de las kozas ke tenemos en muestro doredor. Las flores, las personas ke mos keren byen, los guesmos (koku), la tyerra, i munchas otras kozas.

La Primavera es la sezon la mas amavle entre las kuatro. Es la sezon de la espertura (uyanış) de la vida.

La kanserya, la desfuersa (halsizlik) son las influensas (etkiler) negativas enriva las personas.

Los tyempos ke se kayentan son la kavza; de los desvelos (uykusuzluk), de ser sin gana (iştahsız), de las dolores de las artikulasyones (eklem ağrıları), de las suvidas i abashadas sentimentales (duygusal iniş çıkışlara) i de la kanserya (yorgunluk).

La adaptasyon a los tyempos de esta sezon puede sureyar unos dos mezes.

Las dolores ke se ven en la primavera son; en el entorno de la kavesa, de la garganta (boyun), de la espalda, del bel, migrenes…

Estas dolores se influesan; de la umiditad, del ayre, de la luvya, de la presyon (basınç) del tyempo, del trokamyento del tyempo entrel dia, de lo yelado a lo kayente, de lo kayente a lo yelado, a la luvya i otros trokamyentos inesperados (beklenmedik).

Desharemos esto todo i biviremos el momento (anı yaşamak), porke la vida es solo este momento.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın