Es kon grande alegriya ke lunes a la tadre antes de la fiesta de Pesah, siertos miembros del Sentro Sefardi de Estambol mos arekojimos para una reunyon ande avlimos lo ke devemos azer para el futuro de muestro Sentro i para el Dia Internasional del Ladino / Judeo-Espanyol 2017. Dospues de la realizasyon del Dia del Ladino 2016, reelmente fuimos muy entuzyasmados por el entereso de la djente. Si serka de kuatro sientas personas asistieron a esta reunyon, devemos de azer una aktivitad mas emosyonada. Kualo es esto? Puedeser realizar este diya kon amantes de esta lingua i kultura ke biven en diferentes payizes del mundo. Porke mizmo si muestro payiz ande se avla esta lingua lo mas muncho dospues de Israel, puedeser ke no tiene un nivel muy akademiko. Esta lingua dainda se emplea en muestra sivdad i en İzmir komo una lingua de komunikasyon. Vos kero dar un egzempyo: la semana pasada teniyamos una reunyon entre los dirijentes de muestra komunidad i a la fin el prezidente de la komunidad de Bursa, el sinyor Elnekave (ke es orijinario de Ortaköy) me demando siertas kestyones en djudezmo i tuve el plazer de responderle en esta lingua.
Este anyo el dia del Ladino lo selebrimos en el mez de febrero. Ma kreo ke en el 2017, lo vamos a selebrar entre el 9 i el 12 de marso porke tenemos de menester de un tyempo mas kaynte i mas ermozo mizmo si este anyo no teniamos problemes de luvia ni de inyeve en esta sezon. I deke kuatro diyas? Porke keremos invitar los enteresados ke biven en diferentes payizes del mundo. El primer dia keremos azer un tur a Edirne ande tenemos una singoga maraviyoza; i mizmo organizar un konserto de muzika sefardi. Edirne es una sivdad reelmente muy rika de punto istoriko; savemos ke fue kapitala del Imperio Otomano i la meshkita de Selimiye es una ovra ke es protejada por el UNESCO. Kreo ke una de las maraviyas de Andirne es su Sinagoga ke fue fraguada en el anyo 1908 i restorada el anyo pasado.
Dia de viernes vamos a tener la posibilidad de vijitar siertas institusyones de muestra komunidad mizmo el Muzeo Djudio ke se topa en el kal de Neve Şalom oy en diya. Shabat vamos a tener el plazer de tomar lugar en la mizma meza para el Kidush.
Dia de Shabat la orasyon va tener lugar en el Neve Shalom por los ke son enteresados. Los ke no keren asistir pueden vijitar muestra sivdad. A la noche vamos a tener un teatro en Judeo-Espanyol i este modo vamos a ser prontos para el dia del Ladino / Judeo-Espanyol ke se va realizar dia de alhad. Vamos a ver ken va kerer partisipar; i si ay siertas personas ke mos pueden dar konferensyas en esta lingua keremos ke mos prezenten sus perlas…
Ayde vos estamos asperando a Estanbol…
