Metsora

La perasha de Metsora nos enbeza lo bueno ke trae a la persona la avla buena, de entremeterse la persona kon palavras de ley i mitsvot, la persona tyene paga buena del Kriyador. Ma la kontra si se auzo la persona avlar lashon ara, palavras non buenas, i de raportar palavras ke va traer danyo a su serkano, a su amigo, la pena es muy fuerte.

El verseto dize la vida i la muerte esta dekolgado en la alguenga. Si enpleya la persona su avla para bueno alarga su vida, si no malarozamente aze danyo a su vida i a su salud. Sontrae a si mezmo angustya, i el bierva Tsaraat-Lepra, ke es el nombre de la perasha Metsora. Lo eksplikan nuestros savyos, “Motsi shem ra- el ke kito fama mala”. Kere dizir el ke kita fama mala por su serkano se apena kon la yaga de Lepra- Metsora. El ke aula lashon ara kere dizir mal por su haver, kavza danyo asi mizmo ke se apena, por ke avlo mal.

Dizen nuestros savyos kon la espada se puede dar fin a la vida de la persona ke esta serka de su inimigo, ma kon la laguenga puede matar; kere dizir puede danyar a alguna persona malgrado ke esta leshos de el. Lashon ara, avlar mal entra en un grupo de pekados fuertes komo  Avoda zara sirvir idoloz, i verter sangre. Miryam la ermana de Moshe Rabenu se apeno kon yagas de lepre solo por ke avlo por Moshe Rabenu. Ke se separo de su mujer despues ke devino profeta. De este kavzo puedemoz entender ke karar de grande es la pena de este defekto.

La persona kuando se milizinava de la lepra yevava a el santuvaryo onde el Koen dos palombikas por azerlas korban. Este akto enbezava a akeya persona ke mas no va chuchulear komo los pasharikos i va guadrar a su alguenga de avlar mal.

Komo lo rogamos del Shem Yitbarah en la orasyon de la Amida tres vezes al diya.

“Mi Dyo! Guatra a mi alguenga de avlar mal, i a mis lavyos de avlar mintiras”.

Komo meldamos en el livro Teilim ke dize David Ameleh: “Ken es el varon ke envelunta vidas, Estima a su vida i kere ver bueno, ke guadre a su alguenga de mal, i a sus lavyos de avlar mintiras. Tirate de lo negro, aze syempre lo bueno, bushka la pas i presigela”.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın