El empesijo del enverano

Silvyo OVADYA Köşe Yazısı
6 Nisan 2016 Çarşamba

Kuando fiestamos Purim es el empesijo de la primavera; en Estanbol tenemos las flores ke las yamamos “lale” - tulipas ke son ensembrados en el empesijo del mez de marso i enfloresen en el empesijo del mez de nisan; las puedesh  ver solo un mez. En el mez de avril. En el Bosfor, en Emirgan tenemos un parko ande sembran miles de tulipas i toda le djente se va a vijitar este parko para verlas. Estas flores fueron el simbolo de una epoka en el Impero Otomano: “Lale Devri” en el empesijo del 18 en siglo. Una epoka ande todos los dirijentes del imperio estavan en un lukso egzajerado. Vemos los motifes de esta roza en siertos lavoros otomanos del 12 en siglo. I savemos ke esta roza en el empesijo fue a la Austria, a Viyena i dospues a la Olanda. Oy en diya esta roza es uno de los simbolos de la Olanda i en mizmo tiempo es el simbolo de Estanbol. Deke vos konti esto todo? Este anyo komo unos kuantos diyas en el mez de marso tuvimos un poko de kalor las tulipas no kijeron asperar i las flores mos saludaron mas presto. I todo el efekto de estas flores fue un problema para la munisipalidad d’Estanbol. En primero metyeron torbas de buz para ke las flores no se avren i dospues izieron un alay de kozas. Noche de alhad munchos lavorantes de la munisipalidad estavan arankando las tulipas porke puediyan dar danyo a los arvoles.  En teniendo sienes de problemas ekonomikos, politikos, de teroristos un problema mas: el de las tulipas!

Las tulipas mos dan haber ke el enverano esta empesando. Dospues de Pesah, ke es una fiesta ke reelmente la fiestamos kon muncho plazer komiendo i kantando semos mas orozos kon el sol ke mos kayenta. En mi chikes las eskolas se eskapavan a la fin del mez de mayo. Ma oy en diya estamos komo los paizes Evropeos i tenemos mas manko vakansas en enverano ma tenemos en las eskolas las vakansas de la primavera ke es estas semanas i serka del muevo anyo para no dizir Noel; mizmo puedemos dizir serka de Hanuka otras vakansas. Este modo los estudiantes lavoran kon mas muncha savor saviendo ke tienen vakansas kaji kada dos mezes. I este modo el turizmo lavora mijor. Porke las kriyaturas keren viyajar kuando no se van a la eskola.

Antes kuando mos ivamos a la kampanya – partida Asiatika d’Estanbol komo Caddebostan, Suadiye, Göztepe o a las islas – era para kedarmos a lo manko kuatro mezes sin ir a un otro lugar. Oy empesamos el pazarlik en avlando si mos vamos a ir a las vakansas antes o dospues de la Ada i ande mos vamos a ir kuando es el Bayram (fiesta muzulmana ande ningun echo fonksyona).

Esta semana komo mi ijo ke es estudiante en el liseo tiene el break de la primavera, vamos a vijitar kon el una otra vez la Olanda ande vamos a topar la posibilidad de vijitar la Sinagoga Sefardi; el Muzeo Djudio i la Kaza de Anne Frank entre tantos muzeos renomados de la Olanda ke se topan lo mas en Amsterdam.

Ya savesh puedeser en Turkia estos anyos dalkavo tenemos el sesto de komidas para dar komandas de komidas, el sesto de vakansas para ir a las vakansas i un alay de otros sestos…

Komo era mas barato merki los  bilyetos de avion en empleando el sesto de vakansas. Alkavo merki tres bilyetos sin tener derecho a validjas. Kale azer atansiyon porke esto es la mueva moda. Si savesh puedesh merkar el derecho de validja; si no savesh puedesh pagar un otro bilyeto para las validjas…

 

 

*******************************