Keridos Lektores;

Keridos Lektores;

De vez en kuando la vida arrondja la persona al pesimismo. Antes anyos, kuando eramos mansevos; mos kreyiyamos ke kada soneriya d’el telefon mos dava esperansa para kualker koza.

En tanto ke oy; en kaza, en el echo, en muestra aldikera los telefones ke estan sonando mos estan apretando el korason, mos estan atagantando porke estamos pensando solamente a kozas negras.

Kualo es esta sensivilidad?

Oy malorosamente las personas no se estan kontentando de nada i keren posedar mas muncho de lo ke tyenen, i este sentimyento mos esta mostrando en el doredor un monton de personas ke no estan orozos, un monton de personas ke estan koryendo i para venser al d’en frente se estan olvidando de lo djusto, personas ke no tyenen kerensya.

El umanizmo esta dando muncha emportansa al materyal. Entremyentes se estan olvidando el senso de la vida.

El diya ke mos alevantamos sanos i rezyos es la mas grande favor. Kale engrasyar a todo el puederozo.

La luz d’el diya deve de ser el mesajero de la buendad i de la pas.

La luz es el simbolo de la esperansa, de la sivilizasyon, d’el repozo, de la kerensya, de la tolerensya, de la pas i de la unyon.

La koza la mas emportante de la vida es el pueder d’el Dyo.

La komunikasyon la mas puederoza es la orasyon.

La rikeza la mas valutoza es la kreensya. La fuersa la mas influente es la kerensya. La mas grande felisidad es dar, ayudar a los ke tyenen menester, materyalamente i moralamente.

Kale regrasyar, dar loores al Dyo por todo lo ke posedamos. Las personas los mas orozos son; los ke son atados a sus famiyas i a sus amigos. Eyos partajan todo kon sus entornos.

El tyempo es el mas grande trezoro.

En esta vida kurta i muy presyoza azeremos lo ke keremos, lo ke pensamos sin tadrar. Anchearemos muestros puntos de vistas, muestras ideas. No mos atristaremos por kozas chikas ke no tyenen emportansa. Risiviremos kada diya kon felisidad, kon alegriya.

El sekreto de la pasyon es el buto. Muestro buto sera; komunikar kon las personas en el doredor en ayudandoles, avlar la verdad, sintir los problemes ke tyenen, i azer lo ke puedemos para resolver sus problemes.

La nesesidad la mas profonde d’el korason de la persona es; bivir para todo lo ke es emportante a parte de si mizmo.

Komo disho Churchill: “La valor de la grandor es la responsabilidad”

Dunke; lo ke mos aze una persona es; las reaksyones ke estamos eskojyendo enfrente de un estado determinado.

Las personas apresyan los evenementos de la vida komo keren. Por esta razon, para amijorear las kondisyones; kale trokar de manyas sin asperar el trokamyento d’el d’en frente.

Entender al d’en frente, es la baza de la kerensya.

Los sentimyentos dirijen el komporto de la persona. Solamente kereremos byen al entorno, miraremos asegun es a la persona.

Ya pasimos la fyesta de Purim kon muncha felisidad, sanedad i pas.

Para kada anyo ke mos ayege el Dyo; kon amor en el mundo i pas en el umanizmo sin terrorizmo…

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın