Tazriya

La perasha de la semana nombrada Tazriya vyene a enbezarmos lo bueno ke es, de no danyar a ningunos kon los biervos ke kitamos de nuestra boka. Pero, la kontra, si la persona auzo a su boka a avlar mal, por ken kere ke seya, LASHON ARA, palavras non buenas, i raportar palavras ke pueden sontraer danyo a la cente, i a el mundo, no ay dubyo ke la pena es muy fuerte.

En el livro Mishle de Shelomo Ameleh meldamos; la vida i la muerte esta dekolgado en la alguenga de la persona. El ke enpleya su avla para bueno, alarga su vida. A la kontra malarozamente danya su vida i su salud. Sontrae a si mizmo angusya. El biervo Metsora, Tsaarat Lepra ke meldamoz en la perasha de este semana, la eksplikan nuestros savyos ‘Motsi şem ra’ kere dizir el ke kita fama mala, la konsikuensa es de apenarse kon estas yagas.

Dizen nuestros savyos: “La espada puede danyar a uno ke esta serka; la persona kon su alguenga puede danyar a el ke esta leshos de el”.

Lashon Ara es un defekto de los mas grandez igual a sirvir idolos. Miryam se apeno de parte de el Kriyador solamente por ke avlo kontra su ermano Moshe Rabenu.

Kuando se milizino, el ke se danyo kon la lepra, yevava a el santuvaryo a el Koen dos palombikas por korban.

La sinyefikasyon es ke ya se iva arepintir de de chuchulear komo los pasharikos i guadrar su alguenga.

En la orasyon de la amida rogamos a el Kriyador: “Mi Dyo, guadra a mi alguenga de avlar mal, i a mis lavyos de avlar mintiras”.

David Ameleh en el livro Teilim dize: “Ken es el varon ke envelunta vidas, estima a su vida i kere ver bueno, ke guadre a su alguenga de mal, i a sus lavyos de avlar mintiras. Tirate de lo negro, aze syempre lo bueno bushka la pes i presigela”.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın