Una semana kondensada de aktivitades

Şeli GAON Judeo-Espanyol
21 Mart 2016 Pazartesi

Lunes ultimo fue un dia reushido, el dia organizado por las dirijentes de Golden Age; un dia tradisyonal ande eran envitadas kaji 40 mujeres de diferentes organizasyones ke lavoran komo volontaryas para enalteser el nivel de los ke tyenen menester de apoyo en la komunitad.

Despues del resivo kalorozo i todas kon karas riyentes, pasimos al dezayuno preparado kon muncha atansyon, todas las mezas ornadas de flores de kolores, las mezas yenas de konosidas avlando i pasando un tyempo agradavle. La presidente Lida Sarfati izo una avla kurta en kontando sus misyones ke ez; de okuparsen de los aedados para azerles pasar un tyempo yeno de kerensya, seyga organizando komeres en el Bosfor, seyga en azyendo piknikes, i munchas otras aktivitades…

La envito a la Profesora Pedagoga Norma Razon ke kon su avla dulse i kon la boz de una tonalitad basha (alçak ses tonu); mos aklaro sovre las relasyones de los paryentes kon las kriyaturas de edades diferentes.

Komo las madres i padres, las granmamas i granpapas deven de komportarsen sin arreganchar (şımartmak) las kriyaturas. Merkar djugetes ma sin egzajerar i otras nosyones emportantes en ambezandomos, respondyendo a las demandas ke no se terminaron…

Fue un dia yeno de konosensya. Keridos lektores ya savesh ke; a kada edad tenemos de ambezarmos kozas muevas seyga de los chikos, seyga de los grandes…

Myerkoles ultimo los premyos (ödül) tradisyonales ‘Jane Elkus’ el premyo de Vertud (fazilet), i ‘Josephine Marcus’ el premyo de filantropiya (hayırseverlik) fueron distribuidos kon grande entuzyasmo (coşku) en una de las organizasyones de muestra komunitad.

El premyo de ‘Jane Elkus’ se da; a las ke azen sus doveres de famiya en la komunitad, i a la mujer ke se dediko (adamak) para liberar la djente de la miserya i korye para solver los problemes.

El premyo ‘Josephine Marcus’ se da; a una mujer ke lavora de alma i korason en las organizasyones i asosyasyones de muestra komunitad komo volontarya, kon grande ardor i kon kerensya.

Ceki Kazmir el Presidente de esta organizasyon izo una avla kurta ma muy sinyifikativa en dizyendo:

“Lo ke eleva (yüceltmek) a una komunitad es; los lavoros presyozos de las personas ke apartyenen a esta komunitad. Lo mas emportante es de krear de ser konsyente de kualker koza (farkındalık yaratmak).

El tyene la avla muy fasil, i todo de kavesa sin meldar un papel. Esto es un talento (yetenek) ke tyene la persona de nasimyento.

Esta noche es una noche de orgolyo (gurur) para muestra komunitad…

İ ansi kontinuo en dando detalyos sovre los premyos.

‘Jane Elcus’ premyo de vertud ke se dyo a las mujeres admiravles sovre sus komportos. Los premyos ‘Marcus’, el premyo de Medikeria (tıp), el premyo de kultura, de muzika, premyo de tentativa (girişimci) i el premyo de sensya (fen) i matematika fueron distribuados.

El pintor famozo İzzet Keribar fue onorado kon un premyo por su ‘65 Anyos de Arte’. La nochada se termino kon la kompozisyon müzikal (beste) maraviyoza de Fani Hodara ke la kompozo por esta organizasyon.

Alhad asistimos a una boda ekstraordinarya de Galya Kohen kon Alp Benbanaste ke se realizo en un otel. Galya ija de Klodet i Jojo Kohen kon Alp ijo de Linet i Vladi Benbanaste i inyeto de Sevim i Mois Kohen.

Malgrado la situasyon del pais, el otel se organizo komo una sinagoga. Los mansevos se kazaron debasho la Hupa akompanyados del Grande Rabino Rav İsak Haleva i su mujer kon muncha djente.

En primero el novyo kon su madre i padre, el kon su kara novle, pasaron a sus lugares debasho la Hupa.

Despues la madre de la novya muy elegante kon el ermano, akompanyados de un kortej bastante largo.

Delantre la novya 10 mansevas, todas vistidas una mijor de la otra, los fostanes kon los chapeyos apropriados, los kalsados kon el buketo de rozas en la mano, i a la fin la novya ke paresiya a un ancelo entera blanka kon el velo brodado i kon los ojikos bivos mirando a los envitados i kaminando apoko apoko.

Toda la paryentes, los amigos i konosidos los arisivyeron kon grande entuzyasmo. Fotos kon toda la famiya. Las orasyones i la avlas para krear una mueva famiya kon kerensya, respekto, tolerensya i amistad.

La nochada muy reushida kon la organizasyon del salon, las rozas blankas, las mezas arregladas kon los manteles blankos, di ke paresiya a un sonyo. Las karas riyentes de los paryentes i de los muevos kazados, la enerjiya de los mansevos, la muzika, los envitados, el komer, los bayles todo estava mirakulozo.

Orozos ke esten i ke los paryentes se gusten del entendimyento entre eyos.