Vayakel

Rav Yeuda ADONİ Köşe Yazısı
2 Mart 2016 Çarşamba

En el livro de Shemot la fragua de el santuvaryo okupa un luguar muy grande. Kuatro perashiyot son apropyadas sovre este sujeto. En la perasha de Vayakel, meldamos ke Betsalel ben Uri ben Hur ke era del trivo de Yeuda parvino, i reusho kon nombre de el Kriyador a fraguar el mishkan, el santuvaryo.

Meldando estas perashiyot, no solo vemos la fragua de el mishkan, si no ke tambien vemos la enkomendansa de el diya de Shabat.

En este sujeto, vyene a enbezarmos el Kriyador, ke malgrado el mishkan es una ovra santa, todos las ovras ke son defendidas de azer en Shabat,no se puediya ovrar tambien en el mishkan.

La Tora nos enbeza ke el Kriyador kriyo en el enterval de sesh diyas el mundo. El Kriyador lo yamo a el syeten diya, Shabat. El demando de todos nozotros de santefikarlo i onorarlo. El Djudyo ke guadra el Shabat i lo santefika alarga ke el Dyo es el fondador de el mundo. El puevlo Djudyo resivyo sovre si de guadrar el Shabat, el los afirma todos sus enkomendansas kon grande alegriya i asyende luzes en su kaza, i amostra la alegriya de el diya Shabat.

Kon el Shabat Dyo es yamado Kriyador de el mundo. Shabat kere dizir dar al ombre un repozo i enforteser la fuersa de su kuerpo. Devemos de azer una diferensya de Shabat a los diyas de entre semana.

Santefikar el Shabat kere dizir, konsekrarse a las orasyones, dar se a le estudyo de la relijyon. Este diya es el tyempo mas custo para el kumplimyento de su alma. El diya de Shabat es un sinyal de amor entre Dyo i nozotros, esta aliansa no deve ser anulada.

Eya esta figurada en las tavlas de la ley komo una de las bazas fondamentales de la relijyon Djudiya.

Regalo valorozo tenemos en nuestro poder ke su nombre es Shabat, i esto es su valor, lo puedes entender sea relijyozo, sosyal i kültürel. En el topas la ermozura la santedad i el briyo.

La enkomendansa de Shabat esta en primer rango en las ovligasyones de la personas ke resivyeron sovre eyos las konosensyas del Djudaizmo.