Martes la noche telefoni para demandar kuantas personas se enrejistraron para el Dia del Ladino. Repuesta: solo sien personas! Mierkoles la noche otro telefon kon la mizma demanda. Repuesta: syen i ochenta personas enrejistrados. Djueves a la tadre el Dr. Eliezer Papo kon Karen eran envitados ande mozotros. Kuando entraron la primera koza ke demandi fue: kuantas personas: dozyentas i setenta fue la repuesta d’alkavo. Alhad kon las sinkuenta personas ke vinieron al momento dalkavo estavamos mas de trezyentas i trenta personas en el Sentro Kultural del Neve Şalom. Reelmente no es muy kolay de arekojer este karar de djente para oyir i avlar solo en Judeo–Espanyol un dia entero. Esto mos da koraje para realizar siertos proyektos. Es siguro ke los ke avlaron i ke tomaron lugar en la shena no eran muy mansevos. Ma mizmo esto mos mostra ke esta lingua puede bivir dainda en muestro pais. Komo la Espanya oy en dia kuando esta dando la nasyonalidad a los Sefardim desendientes de los Espanyoles ekspulzados en 1492 kere ke sepan un minimum de Espanyol i siertas kozas sovre la istoria i el modo de vida en la Espanya. Esto va ser una razon muy importante para ke los mansevos se ambezen a lo manko la lingua Espanyola ke va ser un elemento primordial (öncelikli neden) para ke muestra lingua se mantenga. Devemos de rengrasyar al Instituto Cervantes para los esforsos ke esta aziendo para realizar esto. Konosemos al Senyor Pablo Martin Asuero ke ay munchos anyos ke bive en Estanbol i esta en la kavesa de este Instituto.
En los anyos setenta, kuando se diziya ke el Djudezmo se esta muriendo son los mansevos de esta epoka ke empesaron a azer skeches i piyesas de teatro lo mas muncho en Judeo-Espanyol ma mesklado kon el Turko. I empesando kon la “Kula” estas piyesas tuvyeron un sukseso muy importante. Mizmo es en los mizmos anyos ke siertos grupos se formaron komo Los Pasharos Sefaradis, Janet i Jak Esim,… para rekuperar el trezoro ke teniyamos en la muzika sefaradi i kantarlas. Reelmente izieron munchos albumes ke fueron apresiados por los sirkolos (çevre) muzikales. Estos mansevos oy en dia no son mas de la mizma aedad i mizmo si tienen la mizma enerjia dospues de los sesenta, keren ke mansevos komo “Los Viyejos Aksis” ke konoskan a lo manko un poko esta lingua. Vos kero dizir ke puedeser no so un eskrivano emportante por esta lingua ma devo de achetar ke eskriviendo kada semana un artikolo de dia en dia esto avlando mas fluente la lingua de mis avuelos. I munchas personas me estan alavando kuando me ven por los artikolos eskritos en el Şalom o en El Amaneser. No se si todos son sinseros ma a lo manko estan mirando el artikolo i saven el sujeto del artikolo. Si en eskriviendo esto reushendo a alargar la vida de esta lingua esto orozo…
Alhad teniyamos un program muy kargado. Esta semana vos va kontar solo sovre los skeches ke eran las aktivitades las mas emportantes del dia. Soli Avigdor “Edirneliya” ke djugo anyos el los skeches i piyesas del Dostluk malgrado ke los anyos dalkavo no la vemos en las shenas mos konto sus rekuerdos d’Andirne i partikularmente lo ke bivio en la mestra (zamanın yuvası) ke entereso muncho a los partisipantes. Forti Barokas a su torno mos konto lo ke bivio anyos enteros en el teatro. El teatro sefardi de Estanbol ke es apresiado no solo en muestra sivdad mizmo en siertos paizes de la Evropa i lo mas emportante en Israel.
Toda la djente los konosen komo Moiz i Kleret, no saven mizmo ke son Jojo Eskenazi i Fani Bonofiel. Reelmente el Dyo los kreo para la shena. Son artistos ke pueden djugar en kada teatro. Ma sus savidurya en djudezmo los esta elevando a un grado mas alto. Konoser la lingua i ser artisto de komedias en la shena; esto es el mas difisil i estos dos son kapaches de realizar esto.
Para terminar mi artikolo vos va kontar del trio Anna, Suzet i Karen ke son las estreas de los tres anyos dalkavo. Konosiyamos Karen mizmo de la “Kula”; Anna tomo parte en siertas prezentasyones en Judeo-Espanyol. Ya konosi a Suzet kuando era chiko i kuando eramos vizinos empesando en la segunda mitad de los anyos sinkuenta. Ma nunka la puedia imajinarla komo una avladera asemejante. Esta biviendo kada vez lo ke esta kontando. No se si todo lo ke esta kontando son kozas ke bivio; ma kale achetar mizmo si es una istoria kon Suzet no es posivle de entender esto. No se si es posivle para todos los artistos de ambezarse un teksto tan fasilmente. Porke kreo ke es de este modo para Suzet. Kon sus modestia son un trio ke van a ser munchos anyos en las shenas. Ke el Dyo les de muncha salud i vidas largas.
