Los Edifisios de las Minoridades Relijiozas en Turkia

La semanada pasada tuve la okazion de vijitar Smirna kon un grupo de akademisyenes para konoser i klasifiyar los edifisios (sinagogas, ospitales, eskolas i sinagogas) de las minoridades relijiozas ke no son protektados. Savemos ke la Komunidad de Smirna save muy bueno la valor de lo ke poseda. Ya se save ke estan aziendo un proyekto kon la munisipalidad i todos los responsavles para realizar un muzeo formado de kuatro sinagogas ke son una detras de la otra. Shalom, Algazi, Sinyora son las tres de este plano. Reelmente esto va ser un proyekto ke dospues de su realizasion munchos turistos djudios o no: van a kerer vijitar este kuarter de fey (inanç).

Enfrente de la Sinagoga de Bikur Holim, ke es una sinagoga ke konserva toda su otantisidad (tarihi orijinallik- otantiklik) vemos una restorasion de un edifisio de tres kates. I mos disheron ke suposan ke era la kaza del Mashiah falso Sabetay Tsvi (1626-1676) ke reelmente en esta epoka bulverso (allak bullak etmek) todas las komunidades djudias de Smyrna asta las sivdades polonezas. Esta restorasion no tiene dar i aver (ilişki) kon la Komunidad Djudia de Smirna. Ocho–mueve anyos antes, la Kamareta del Komersio de Smyrna en sus proyektos tenia la restorasion de la Kaza de Sabetai Tsvi kon la komunidad. En este tiempo era prezidente de la Komunidad Djudia de Turkia i les di haber ke avia en el program de la Kamareta del Komersio un proyekto asemejante ke no puedia tener relasyon kon la Komunidad Djudia. Todos saven ke durante anyos no vimos relasyones (desparte de las relasyones personales) entre la Komunidad Djudia i los Sabetaistos. Ma kreo ke dospues ke la Munisipalidad de Smyrna va kompletar la restorasion de este edifisio va ser un lugar de pelegrinaje (hac yeri) para los enteresados. Esto es una pretansion (iddia) muy fuerte ma kreo ke va tener razon. Bivir i ver…

Unos kuantos mezes antes, una konferensia entitulada “Las iglesias transformadas en meshkitas” fue dada en una asosiasion. En Estanbol savemos la Santa Sofia ke fue transformada ma ke oy en dia es un muzeo, la Meshkita Kariye ke era una iglesia i ke se topa en Edirnekapı serka de la Sinagoga de Ishtipol. En Alaçatı-Çeşme tuve la okazion de vijitar la meshkita Kilise (iglesia) o Pazarönü ande konserva todas sus elementos de iglesia; la partida ke es iglesia pura puede ser vijitada ma es despartida kon el enterior de la meshkita kon una kortina (perde).

No se si ay munchos egzempyos ma savemos ke la kehila de Çorlu fue transformada en meshkita i es yamada “Havra Camii”. No se si tenemos otras meshkitas ke son la transformasion de siertas sinagogas. Vos rogo de informarmos si konosesh lugares asemejantes.

Por los ke no saven kero informarvos ke en 1923, dospues el Akordo de Lozan desparte de Estanbol los Gregos piedreron todas sus iglesias. I los muzulmanos todas las meshkitas en Gresia en las sivdades i en los kazales ke abondonaron en viniendo a la Turkiya. En Anatolia inkluzo Smirna avia mas de mil iglesias ke son sin propriyetaryo oy en dia i i kreo ke kale dar razon a los governos ke no restoraron i ke no pueden restorar i konservar todas estas iglesias.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın