El treser Dia Internasyonal del Ladino en Estambol

El 7 Febrero vamos a tener el plazer de partisipar por la tresera vez al dia del djudeo espanyol/ladino en Estanbol en el Sentro Kultural del Neve Shalom. El Sentro de Investigasyones sovre la Kultura Sefardi Otomana-Turka esta organizando un dia yeno de aktividades empesando a las 11.00 asta la fin del dia (kreo ke se va eskapar a las 5.00 de la tadre).

No tenemos el program definitivo ma kreo ke vamos a riir porke tenemos uno o dos teatros o skeches. Anyos enteros tuvimos la posibilidad de ir a las piyesas de teatro de “Moiz …’’ ande Moiz i su mujer mos izieron riir . En este dia vamos a tener la posibilidad de estar una otra vez kon eyos. No kale olvidarse de las tres dammas ke mos estan kontando de lo pasado en empleando siertos biervos peludos i las dichas ke no empleamos mas. Kreo ke va ser un plazer de estar endjuntos kon Anna, Suzet i Karen. Ay mizmo otras personas ke keren la shena ma kreo ke va ser bastante.

En este dia vamos a tener el plazer de sintir el Sinyor Pablo Benavides, Konsul General d’Espanya i el Sinyor Pablo Martin Asuero, direktor del Sentro Cervantes en Estanbol. Kreo ke van a topar la posibilidad de adresarsen al publiko sovre la nasyonalidad Espanyola ke fue dado a los Sefardim orijinarios d’Espanya. La djente esta kuryoza para saver lo ke van a dizir. Mizmo estan enteresados si van a pasar un egzamen de Espanyol mizmo si konosen el djudeo espanyol. Dospues ke un alay de djente fueron achetados por la Espanya, todos estan enteresados para ser sivdadinos d’Espanya. Vos kero dizir los mas enteresados son los Sefardim turkanos i los Israelyanos. Porke estos dos payizes no son miembros de la Unyon Evropea. Los Sefardim bulgaros, gregos o romanos no son tan enteresados porke sus paizes son miembros de la Unyon. Vamos a ver lo ke se va pasar.

La Profesora Tamar Alexander ke es la mueva prezidente de la Autoridad Nasyonala del Ladino i su Kultura va estar kon mozotros en este dia. La Autoridad reelmente es muy importante para el futuro de esta lingua. Si los estados komo Israel o Espanya no son prontos a ayudar i dar apoyo a todo modo de esforsos ke se esta dando para esta lingua i kultura, los esforsos pueden ser solo individual. En Turkiya se esta aziendo esforsos en el Sentro i en el semanario Şalom. Oyimos ke la Universitad del Bosforus (Boğaziçi Üniversitesi) s’esta aparejando para fondar un departamento para el Djudaismo. Avli kon la profesora ke se enteresa i reelmente no entendi en ke kampo van a lavorar. La relijion o la istoria o la kultura o la filozofia son puede ser kozas ke tienen dar i aver. Ma kada sujeto tiene su spesialidad. Kreo ke no se van enteresar kon la Kultura Sefaradi mizmo si tuvo una importansa en estas tierras. Una de las konferensias emportantes de este dia devemos de sitar el sinyor Eliezer Papo. El ke ensenya en la Universitad de Ben Gurion reelmente es kapache de azervos riir mizmo en las avlas seriozas.

No puedemos avlar de un dia de los djudios Sefardis sin komida. Al medyo diya vamos a komer komidas ke se giza mizmo oy en diya en las famiyas djudias de muestro paiz. Es djusto ke en la mueva jenerasyon ay kriaturas, mizmo mansevos ke komen hamburgeres, patatas fritas, pizzas i todo modo de fast food i no konosen las zarzavates. Los amigos de mi ijo ke tiene katorze anyos de vez en kuando komen en muestra kaza i reelmente la majorita no komen zarzavates. En la kozina Sefardi las komidas ke son gizadas kon berendjena, kalavasa, espinaka, apyo, prasa, kol (lahana) i otras zarzavates son muy emportantes. I sin komer este modo de komidas no es posivle de konoser el gizado sefaradi. Vamos a ver lo ke mos van aparejar este dia.

Kreo ke vamos a tener una o dos ekspozisyones en este dia. La muzika va ser la dulsurya del pranso. Kreo ke vamos a eskapar el dia kon un konserto de unas kuantas kantikas. No kale olvidar la loteria ke se va realizar i vamos a tener la oportunidad de ganar una ovra d’arte.

Ayde presto vos estamos asperando al Dia del Ladino (Djudeo-espanyol).

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın