Fin de anyo

Ya savesh ke el kalendaryo de la era kristiana no enteresa muncho a los djudios porke esta data “anyo muevo” de punto de vista relijioza deve de enteresar solo a los kristianos. Ma no es este modo en muestra manera de vida. Todo es organizado sovre el kalendaryo kristiano ke oy en diya estamos biviendo los dalkavo diyas del anyo 2015. La semana pasada todos los eskrivanos del Şalom kon los ke lavoran para ke el Şalom este en un nivel alto se arekojeron en un lokal ande komieron, bevieron i tuvieron relasyones serkanas. Es solo una vez al anyo ke se organiza una nochada asemejante. Mas de sesenta personas todos yeno de emosyon son orozos en esta nochada ande topan la oportunidad de partajar sus ideas i sus puntos de vista.

Es enteresante de topar una asistensya de vente – ventisinko anyos asta sesenta i sinko mizmo setenta anyos. Si vos topash en esta ambiyans reelmente vos parese ke son todos amigos mizmo si tienen una mizmo dos jenerasyones de diferensya. El anyo pasado dospues de munchos anyos tuve la oportunidad de estar endjuntos kon este grupo i este anyo kon grande orgolyo ize mi posivle para partisipar. Rengrasyo a İvo Molinas i todos los ke organizaron esta nochada.

Kero kontinuar mi artikolo kon el diya del Ladino (Judeo Espanyol) ke vamos a organizar por la segunda vez en Estanbol. No izimos dainda la seduta. Aviamos desidado de azer esta reunion la semana pasada ma Karen me disho ke munchos no puedian partisipar i kreo ke vamos realizar esta seduta la primera semana del muevo anyo. Mos vamos a reunir para desidar lo ke puedemos azer el 7 de Febrero. El anyo pasado reelmente tuvimos una asistensya ke no mos puediamos imajinar. El Sentro Kultural del Neve Şalom estava bastante yeno.

Este diya reelmente es muy emportante para el avenir del djudezmo en muestra komunidad i en muestra sivdad. El primer anyo no teniyamos avladores del estranjero. No se las ideas ke se van a trokar en la reunion ma mi opinion es ke devemos de ser aviertos a siertas personas ke mos van a aklarar sovre la kultura Judeo espanyola. Un poko de muzika. Kreo ke Karen mos va kantar kon İzzet unas kuantas kantikas del muevo CD ke estamos publikando sovre los tangos sefardis antiguos i muevos kompozados. La asistensia ke van a partisipar a este diya van a tener la oportunidad de oyir esta muzika. No se si es la mizma koza en Evropa i en los Estados Unidos ma oy en diya ay muy poka djente ke merkan CD’s de muzika, mizmo oy en Estanbol no es muy fasil de topar un CD player (ande puedesh sintir la muzika ke es enrejistrada en el CD). Oy en diya es la moda kon los Iphones , Ipad o kompyuteres Apple ande se emplea el “I tunes” i se puede merkar todo modo de kantika o de CD. Mira esta manera de oyir muzika. Kuarenta – sinkuenta anyos antes teniyamos los pikapes “dual” ke eran muy famozos i se oyia la muzika kon long playes de 33 tornos ande era posivle de oyir una diezen de kantikas. Dospues empeso las kasetas i los CD’s. Dospues fue el retorno de los long playes i oy en diya los venden kon hadras i baranas. Dospues ke vide esto me fui a mi amigo Moris Kaspi ke es enjenyer de elektronika i ke tiene uno de los mijores servisios de reparasyon para los apareyes elektronikos, i le demandi de alimpyar el pikap i meter una mueva alguja para no mallograr los long playes. Manos bendichas lo izo muevo. I empesi a sintir los long pleyes de los anyos setenta i puedeser ochenta… La amiga ke es la patrona del studio ande enrejistrimos el CD, Ceyda Pirali, me disho ke devemos de avlar kon una kompanyia para difuzar las kantikas en el I-tune.

Kada diya una koza mueva.

Vos esto demandando de darmos ideas por el Diya del Ladino telefonando a muestra asosyasyon o al Şalom i dar vuestras ideas a la Sinypora Emel Benbasat. Mizmo si keresh dar una konferensya o un diskorso -no es siguro ke vamos a achetar todo modo de avlas-no vos chekineyesh de propozar.

Espero ke este anyo el Diya del Ladino va ser reushido komo el anyo pasado.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın