La gola es mazaloza

Silvyo OVADYA Köşe Yazısı
23 Aralık 2015 Çarşamba

Mi gran papa orijinario de Hasköy ke paso la mas grande parte de su vida en Paris (entre los anyos 1918 i 1974 el anyo de su muerte – nasio en el 19 en siglo i se fuyo de la gerra kuando era soldado en la armada Otomana en tomando el primer vapor para Marsilya …) empleava esta palavra “la gola es mazaloza” para sinyifikar ke dingunos no se mueren de ambre kolay kolay. El ke bivio reelmente dos gerras, la primera en el servisio militaryo en la armada Otomana komiendo pan, sal i pimienta porke no puediya komer la “karavana”; komida ke se kome de una kaldera kon munchas personas empleando solo kucharas – i komo era tikitiki (no topi este biervo en el diksyonarya ma lo empleavamos mizmo en kaza para personas ke miren muncho la limpyeza) i en la segunda gerra komo djudio i sin lavoro paso sesh anyos bivyendo munchas difikultades i orozamente el, su mujer, mi madre i mi tiyo Albert reusheron a salvar sus vidas sin irsen a los kampos mizmo ke mi madre i su ermano eran fransezes i teniyan “el magen David” eskrito Juif ensima. Todos savian ke eran Djudios. Mi tiyo se fuyo a la “Zone Libre!” a Marsilya i mi madre ke era mas chika paso unos kuantos anyos en un monasteryo serka de Paris de las sores espanyoles. El patron de mi granpapa ke era Espanyol salvo la vida de mi madre i por esta razon tengo el mazal de eskrivirvos este artikolo… En Estanbol teniamos el Profesor mediko Marko Benbanaste ke ensenyava en la Universitad de Roma i era operator (ya se ke teniamos otro mediko Marko Benbanaste ke era neuropsikiatr i era muy famozo; ma vos esto avlando sovre el otro Benbanaste) un diya allado de su hazino estava dizyendo ke dingun de sus pasientes se muryeron de ambre ma munchos entre eyos tuvieron problemas seryozos (kolesterol, diabet, asid urik, trigliserid …) porke komieron muncho.

Dospues ke vos konti esto todo vos va kontar sovre la nochada ke partisipimos la semana pasada; noche de martes en un klub muy famozo en Moda. Vos avia dado el aviso unas kuantas semanas antes ke vamos a partisipar a un pranso ande vamos a tener la okazyon de komer komidas gregas, ermenis i djudias - sefardis, kada komida gizada por los maestros de esta kozina. Komo devo de kontarvos este pranso ande les propozi de yamar unas kuantas ambulansyas porke va ser muy yuch de dijerar estas tres komidas ke komimos en unas kuantas oras? Orozamente estamos sanos i rezyos, sin ir al mediko i sin azer analizes. Vos kero dizir ke esta nochada ande serka de dosyentas personas asistyeron era la primera en muestra sivdad ande los meraklis tuvieron la oportunidad de gostar komidas de estos tres mutbakes. La nochada era organizada por una asosyasyon ke se yama “Amigos de la Kozina”. I es una asosyasyon ke lavora kon ritueles. Antes de komer los diridjantes de la asosyasyon kon seremonia vinieron a la shena para una seremonia kon una kuchara ke se topava en un kuti. Todos los miembros de la asosyasyon tenian una koka en la garganta (boyun) para ke se sepa ke son miembros de la asosyasyon.

Ya se ke no savesh dainda lo ke komimos! Malorozamente devesh de asperar otras dos semanas para meldar lo ke komimos i lo ke no puedimos komer en esta nochada. El Amaneser va ser el lugar ande vash a meldar, dijerar i espidir el menu de esta nochada ke no era muy kasher.