Las Relasyones de la Turkiya kon la Rusia

Silvyo OVADYA Köşe Yazısı
9 Aralık 2015 Çarşamba

Ay unos kuantos anyos kuando estash en la kaye ay kriaturas ke vienen de la Siria i ke demandan sedaka. Estas kriaturas i sus parientes estan biviendo en malas kondisyones. Muestro pais la Turkiya esta menasada por miliones de emigrantes Sirianos ke fuyen las kondisyones de sus payises. La Turkiya es un payis para pueder pasar a la Evropa.

El 24 de novembre un aviyon de gerra Ruso fue atakado i fue ferido (vurulmak) por los turkos porke este aviyon depaso la frontiera turka en la rejyon de la Siria. I el filmo se arranko; mizmo se despedaso. Dingunos no asperava una reaksyon asemejante del lider ruso Putin. El primer diya los ke partisiparon a una ekspozisyon de agrikultura fueron arestados porke no teniyan vizas komersiyales. Pagaron una pena de moneda emportante i fueron embiyados a un kampo antes de ser ekspulzados de la Rusia.

Komo es muy difisil en muestro pais de ser akseptado en la universidades ay munchos estudiantes ke azen sus estudios universitaryos en la Rusia. Dospues del evenimiento los Rusos desidieron de embiyar estos todos estudiantes del pais; sin dar en la mano un dokumento sovre lo ke estudiaron. Entre eyos se topava mismo siertos ke van a ser diplomados en unos kuantos mezes. Ke pekado…

 En la Turkiya no se topa ‘’el gaz natural” (doğal gaz) ma mas de los sinkuenta por syen de la elektrisita es malorozamente produizida kon el gaz natural. Ay munchas arabas ke lavoran ni kon benzin ni kon diesel ma kon gaz likido komo el gaz ke empleamos en las kozinas. Esto empeso kuando la benzina estava muy kara (no esta mas barato oy en diya mizmo si el presyo del petrol abasho a los kuarenta por syen de lo ke era). Oy en diya mos ambezimos kon estos evenimientos ke kuarenta por syen de las arabas en muestro pais fonksyonan kon gaz likuido.

El sinyor Putin komo esta muy inyervozo disho ke no kere mas embiyar ni el gaz natural, ni el gaz likido ni el petrol ke es reelmente muy emportante para la Turkiya. Dospues ke el presyo del petrol abasho a 40 dolares kreo ke la Rusia komo otros paizes se mantienen de este revenido (gelir). I la Turkiya es muy emportante para la Rusia porke esta ankesando serka de vente i sinko milyardas de dolares. Puedeser todo no es del petrol o del gaz. Ma esto es el artikolo el mas emportante. La Turkiya en esta situasyon empeso a topar gaz o petrol de otros paizes komo el Katar, el Azarbeidjan i otro paizes.

 El turizmo es reelmente muy emportante para la Turkiya. Mizmo dospues de la devalüasyon del ruble los Rusos kontinuaron a vijitar muestro pais. Devemos achetar ke Antalya es una sivdad un poko turka i un poko rusa . Ay una grande populasypon ke merkaron kazas en Antalya i son muy orozos de bivir en muestro paiz i en esta sivdad. Mizmo ay munchas mujeres ke son kazadas kon turkos. Kada anyo dospues de la devalüasyon del ruble ruso mas de kuatro miliones de turistos ruses vienen a vijitar la Turkiya. Antalya es la sivdad la mas famoza de Evropa ande munchos ekipes de futbol vienen un mez a esta sivdad para azer sus antrenamiyentos. I serka de sinkuenta por syen de estas ekipas son Ruses. Dospues ke anularon sus rezervasyones mas de syen i vente milyones de dolares fueron pyedridas.

 La Rusia kuando tiene problemes diplomatikos empesa a no merkar de los paizes ke no son de la mizma idea ke su paiz. Ya vimos este filmo unos kuantos mezes antes i los paizes de la Evropa no pudieron eksportar los kezos, los produktos de leche i siertas zarzavates. Esta desizion fue una okazion para la Turkiya i las firmas ke produizen artikolos de leche empesaron a eksportar artikolos a la Rusia. La mueva desizion es de no merkar frutas i zarzavates de la Turkiya en el 2016; ma los kamyones son en negro estado oy en diya en las frontyeras Rusas. En los reportajes ke estamos sintiento en las radios o en las televizyones mos estan kontando ke todas estas frutas i zarzavates se van a echar al chop. No se si devemos de ser kontentes en Estanbol para pueder komer estas frutas o zarzavates mas barato. Malorozamente las mandalinas ke se vende a ochenta groshes (ni una lira) oy en diya en el hal (ande se vende toda la fruta i zarzavat de muestra sivdad para los zarzavachis) se esta vendiendo dainda a sinko liras en los marketes. Ke mankansa de piadad (insafsızlık).

Las personas normalmente se olvidan los evenimientos malos ke bivieron. Es la mizma koza para los paizes. Espero ke todos estos problemes se van a rezolver en poko tiempo.