Limmud es un festival de kultura ke se organizo en 08.11.2015 en la eskola djudiya Ulus Musevi Lisesi en Estambol. Es el onzen anyo ke se esta organizando en una manera perfekta; en reushendo a trayer personas, profesores de grande valor, emportantes en sus espasyos i dando la emportansa menesteroza a todos los detalyos.
La sinyifikasyon de Limmud; es ambezar, estudyar.
El buto es; ambezar kon la partisipasyon de la persona i dar la okazyon de developar muestra identitad.
Limmud ambeza a los partisipantes a partajar la konosensya, sin asperar nada del den frente.
Developa la identitad djudiya i arezya (güçlendirmek) la kultura. Es una kollektivitad de estudyo.
Shabat la noche, despues de un kokteyl preparado kon muncha atansyon por La CASA Catering, una manseva izo una avla de avyertura (açılış konuşması) en turko i en ingles por prezentar el program de la nochada.
Roger Cohen, un jurnalisto ke lavoro mas de dyes anyos en el jurnal New York Times komo un korespondyente de ovedades etranjeras (dış haberler muhabiri). Despues de ser en diferentes paises korespondyente i dirijente; el ampeso a dirijir en el mizmo jurnal la seksyon de las novedades etranjeras en la data 11.09.2001 la demanyana del atako de las torres buchukas (İkiz Kuleler) en New York. Tomo munchos premyos (ödül) en su vida profesyonal.
El avlo sovre la situasyon de los djudyos en el mundo entero.
El sigundo era; Itay Talgam ke avlo en el sujeto:
‘Ser Lider en la Musica Djudiya’. Dirijir komo un şef grande.
Sempatiko, kayente i aktivo fue engrasyado por los partisipantes.
Alhad demanyana, la primera konferensya enteresante ke partisipi fue del Prof. Dr. İlber Ortaylı ke es un profesör de istorya konosido en el mundo i un personaje reushido en su espasyo, kultivado i spiritual en avlando.
‘Komo Vinimos a Estos Dias’, era el sujeto de su avla.
El profesör ampeso en dando la istorya de los djudyos sefarades ke vinyeron al kinzen syeklo al Emperyo Otomano.
El disho ke el Emperador Otomano era el solo ke akseptava los refujyados (mülteciler) a sus tyerras. Kontinuo en dando detalyos sovre la situasyon de la Turkiya de oy despues las eleksyones (seçim).
La sigunda ke partisipi fue Charlotte Gabay una manseva de 40 anyos, perfekta en su espasyo (alan), ke su sujeto es: ‘La Kapachitad Enşuente en la Komunikasyon’ (Etkili iletişim becerileri), ‘Reushir en lo ke es İmposivle’, (İmkansızı Başarmak).
Charlotte ampeso en dandomos a entender lo ke es la komünikasyon i ande se puede realizar.
La kestyon ke mos demando era: Los sentimyentos vyenen en primero u los penseryos? (Duygular mı, düşünceler mi önce gelir). La lingua (lisan), el puerpo (beden) i los sentimyentos (duygular) forman la persona.
“Somos responsavles un poko de lo ke mos vyene a la kavesa; ma somos syen por syen responsavles de muestras reaksyones (tepki).”
“Devemos de kontrolar muestras reaksyones.”
Viktor Apalaçi el duayen de los Festivales de Cannes; mos konto los 50 anyos ke paso en iyindo i vinyendo, kon unas kuantas anekdotas (fıkra).
Verso la fin, fue la mas ermoza aktivitad para mi en el Limmud de este anyo.
Rita Ender una avokata de 32 anyos, entelijente, laboryoza, izo un filmo de medya ora; para amostrarmos ke; la lingua djudeo-espanyol ke no se esta empleando mas; izo interviews kon mansevas i mansevos ke no estan puedyendo avlar i otros ke saven 3-4 byervos en Ladino.
‘Las Ultimas Palavras’ (Son Sözler).
A la fin fin, el jurnalisto famozo Ahmet Hakan vino i ampeso a avlar en dizyendo ke los djudyos de Turkiya no dyeron emportansa a esta lingua para avlar, i komo eyos no avlaron i sus kriyaturas no se puedyeron ambezar.
Fue un dia muy enteresante, koryendo de klasa a klasa, abashando i suvyendo las eskaleras, ... para alkansar i no peryer ni un punto de la konferensya…
El Dyo ke mos ayege para kada anyo mijorado, kon todos endjuntos, kon sanedad, parnasa i felisitasyones a todas las volontaryas i volontaryos ke organizaron este dia inolvidavle i yeno de saveduria…
