El Seminario del Limmud

Silvyo OVADYA Köşe Yazısı
4 Kasım 2015 Çarşamba

Pensando lo ke devo de eskrivir esta semana para ke los lektores topen siertas kozas enteresantes, desidi de eskrivir sovre el Seminario Limmud ke se organiza en muestra sivdad estos diez anyos dalkavo. Este festival de kultura i arte fue realizada por la primera vez en Inglateria en el anyo 1979. Anyos dospues un grupo enkavesado por la sinyora Gina Alkaş empesaron a organizar el Limmud en Estanbol. En poko tiempo mas de mil i dozientas personas kada anyo asperan kon pasensya el program de las konferensias; de las ekspozisyones i de los filmos ke se van a prezentar en este dia. Este anyo las aktividades se van a realizar el 7 noviembre a la tadre i el 8 noviembre dia de alhad de la demanyana fin a la noche.

Voz va avlar solo sovre unos kuantos de estas dizenas de konferensias. Malorozamente es una koza muy difisil para los partisipantes de eskojer ande se deve de ir porke se realiza kuatro o sinko konferensias en la mizma ora. Por esta razon devesh de eskojer solo sinko o sesh aktividades dia entero.

Este anyo las ekspozisyones prezentadas son: “Mi madre i mi tiya me trikotavan puloveres (kazak)”; kreo ke es una ekspozision de fotografias de Alberto Modiano. El avokato Melih Sisa prezentar un alay de livros i puedeser objetos sovre el “Chiko Prens-Princhipito”. El Sinyor Sisa, uno de los mas famozos koleksyonaryos sovre este sujeto. No se si lo savesh ma este livro eskrito por Saint-Exupery en fransez fue trasladado en mas de dozientas i sinkuenta linguas i dialektos. Una otra ekspozision de fotografias va ser prezentada por Yusuf Benlevi entitulado “Las Tierras Santas”.

Este anyo los organizatores envitaron buen karar de djornalistos renomados en Turkiya. Ahmet Hakan ke era renomado i dospues ke fue atakado i aharvado por tres personas su fama s’enfortesio. El titolo de su konferensia va ser: ‘’Djornalizmo Politika”; Hakan Çelik “El Mundo i la Turkiya en 2016 dospues de los desvelopamientos politikos i ekonomikos”; Tolga Tanış ke es los tiempos dalkavo una otoritad sovre las relasiones Turkas Amerikanas va avlar sovre las relasiones entre Ankara i Washington en la epoka de Obama; la sinyora Prof. Nuray Mert mos va valorizar la situasion politika de la Turkiya dospues de las eleksiones de la semana pasada. Emin Çapa ke es un djornalisto de ekonomia en el kanal de television CNN mos va dar i el una konferensia.

Los ke son enteresados kon la lingua judeo-espanyola deven de partisipar a la seansa teatral de las tres dammas ke tuvieron un sukseso emportante el anyo pasado. La aktividad prezentada en judeo espanyol par las sinyoras Anna Eskenazi , Karen Şarhon i Süzet Herman tiene el titolo “Kula, Kulis, Kule: Una de ver, una de kontar” ke es una parodia ke pasa en la Kula en los anyos 1955. El Sinyor Avi Mizrahi moz va prezentar una konferensia sovre Roza Eskenazi (1880-1980) la muzika i el ombre – la formasion de una nasion moderna en Turkia i Gresia… El titolo esta bastante peludo. Vamos a ver lo ke mos va kontar. Muestro amigo Rubi Asa ke izo un esforso emportante para la restorasion de la Grande Sinagoga d’Andirne va avlar sovre el renasimiento (yeniden doğuş) de la Sinagoga dé Andirne. El sinyor Maks Maçorro va avlar sovre la İstoria de los Sefardim fina el anyo 1492.

En siertas universidades ay personas djudios(ias) ke son envitados para ser livro “djudio”. Este es un proyekto para los prejuisyos (ön yargı). I kada elevo o persona vos demanda kestiones sovre el djudaismo. I puedesh ver lo ke los elevos de universidades son inyorentes sovre el djudaizmo. En el mizmo dia ay otros livros en la biblioteka komo travestis, ermenis, parientes de omoseksuales, personas ke tienen problemas fizikos komo siegos, personas ke bivieron en las priziones. Ceni Palti, Henri Çiprut , Recep Küçük i Yusuf Rodi Mızrak van a partajar sus eksperiensias.

Los ke son enteresados al sinema este anyo van a topar unas kuantas konferensias. El sinyor Erdoğan Mitrani va avlar sovre el Sinema Israeliano, Viktor Apalaçi mos va kontar sus rekuerdos de sinkuenta anyos sovre el Festival de Cannes. Los mansevos ke estudiaron sovre el sinema i azen este echo Eytan İpeker i Yoel Meranda mos van a kontar sovre la realizasion de un filmo de las ideas a la realizasyon.

Por los meraklis de istoria el Profesor İlber Ortaylı va prezentar su avla “Komo vinimos a estos dias”; el Sinyor Mehmet Fatih Uslu de la universitad Şehir mos va avlar sovre la Literatura de los non musulmanos en el Imperio Ottomano.

 Selman Ruso mos va prezentar su konferensia entitulada “Los Profetas del mundo finansiero: los Roschildes i el misteryo de sus sukseso”.

Emir Alkaş kon İsmail Şenol mos van a avlar sovre el livro de Phil Jackson i Charley Rosen entitulado “More than a game-Basketball”. El sinyor Metin Aroyo mos va avlar de Ironman-Triatlon; si era tan fasil todos la puediyan azer. Mos va kontar kreo sovre la kompetisyon ke se realizo en Antalya kompozada de una natasion (yüzme) de 3800 metros de una kompetisyon de bisikleta de 180 kilometros i una korrida de 42 kilometros todos los tres realizados el mizmo dia sin entervalo.

El artisto de Grafitti Emir Karyo va avlar sovre el Grafitti; Enis Karavil i Serena Uziyel sovre la kreatividad i la antrepronoridad (girişimcilik).

Vos konti solo unos kuantos de las konferensias ke van a ser prezentadas dia de alhad. Si vos adresatesh para partisipar devesh de estudiar el program para eskojer lo ke keresh. Si no vos adresatesh devesh de asperar un anyo otro para partisipar.