Leh Leha

Rav Yeuda ADONİ Köşe Yazısı
21 Ekim 2015 Çarşamba

Avraam Avinu sigun el orden de El Kriyador tomo a Sara i a Lot su sovrino i vinyeron a la tyera de Kenaan. Estonses se deklaro unas diferensyas entre los pastores de Lot ,sovrino de Avraam kon los pastores de Avraam, por kavza de la tyera no abastesiya a mantener la muchidumbre de ganado, ovejas i kuatropeas ke teniyan entre eyos.

Avraam Avinu keryendo evitar ke no uvyera pletos entre el i su sovrino, le roga a Lot su sovrino de espartirse de el i irse a luguar ke le plaze mijor.

Lot izo lo ke disho Avraam Avinu i eskojo la yenura de el Yarden ke es serka de las sivdades Sedom i Amora, i fue i se aresento a ai. Avraam se asento en la tyera de Kenaan, en Hevron en las yanures de una persona nombrada Mamre. En akeos tyempos se deklaro una gerra entre los reyes de akeos luguares. Los reyes de Sedom i de Amora i otros tres reyes de una parte, i Kedarlaomer rey de la sivdad de Elam i tres reyes kon el de otra parte.

La batalya fue vensida por Kedarlaomer i su partida i tomaron todos los byenes de Sedom i Amora. I se yevaron tambien a Lot i a toda su azyenda.

Tuvyendo avizo Avraam Avinu, de este akontesimyento tomo kon el 318 personas de sus desiplos i presiggo a Kedorlaomer i sus kompanyeros i los alkanso i destruyo todo su fonsado, i rezgato a Lot su sovrino i toda su azyenda, i a Sedom i a Amora i todos las persones ke fueron kativados.

Avraam se torno a su luguar i Lot se fue a Sedom akompanyado de los reyes.

Estonses le dyo a saver El Kriyador a Avraam Avinu kon profetiziya todo lo ke tyene ke pasar su semen despues de tyempo, i ke tenian ke estar kativas en tyeras ajenas, i le prometyo a el i a su semen prometas grandes.

Syendo Avraam Avinu de 99 anyos, le komendo El Kriyador ke se sirkusyera el i Yismael su ijo i todos los machos de su kaza. Esta enkomendansa de Mila deven de guadrarla su semen para syempre ke es un sinyal de aliansa i amistad ke izo El Kriyador a Avraam de darle un ijo de Sara su mujer despues de un anyo.