Mos vamos a Edirne…

Komo todos los kompatriotos de muestro pais, dia de Shabat fuimos muy tristes dospues del atako teroristo ke fue realizado kon dos teroristos ke se suisidaron kon las bombas en el empesijo de una manifestasion para la pas en el pais. Malorozamente el atako teroristo fue realizado en la kapital de muestro pais, en Ankara, i malorozamente serka de sien personas de mueve anyos fina setenta anyos fueron matados. Oy en dia (lunes la noche) serka de sesenta i sinko personas son en una situasion muy grave en los ospitales. En tres semanas, el puevlo se va ir a votar para elijir los parlamentarios ke van aprovar a dirijir el pais. Aprovar porke no reusheron dospues de las eleksiones del mez de junio…

Este alhad vamos a estar en Edirne para la avyertura de una ekspozision ke va topar lugar en la Sinagoga. La ekspozision tiene komo sujeto las rikezas kulturales de la sivdad de Edirne - Anderne. Los artistos son los miembros del Grupo Focus enkavesado por Rubi Asa i Vladi Benbanaste. El grupo lavoro muncho tiempo para reflektar las rikezas de esta sivdad ke fue un sierto tiempo la kapital del Imperio Otomano. Alhad dospues del arvit vamos a tener la posibilidad de admirar lo ke mos van a prezentar.

A la tadre el koro de la muzika turka de Edirne ke realiza sus aktivitades debasho de la proteksyon del Ministerio de la Kultura mos va prezentar un konserto de muzika klasika turka ande van azer konoser doz kompozitores djudios muy importantes. Tanburi İsak Efendi ke era el profesör del Sultan Selim (3.); i Mısırlı İbrahim (Avram Levi) Efendi (1879-1948 ) ke es muy renomado en los serklos muzikales. Los ke no biven en Turkia puedeser ke no konosen komo se kanta en las orasyones en los kales. Los hazanes deven de konoser la muzika turka para ke la asistensia los apresie. Vemos ke munchos hazanes anyos antes fueron los kompozitores de siertas kantikas de muzika turka. I dia de alhad los ke van a estar en Edirne van a topar la posibilidad de oyer estas kantikas.

Ke no vos pareska ke konosemos solo estos dos kompozitores. Anyos antes tuve la posibilidad de azer un CD (por la Kaza de Edision del Şalom - Gözlem) kon el koro el mas emportante d’Estanbol dirijado por el Doktor Nevzat Atlığ. Publikado vente anyos antes el CD tiene un livretto de diisesh ojas ande puedesh topar siertas ideas sovre los kompozitores djudios en la muzika klasika turka.

Para los ke no vijitaron Edirne i su sinagoga maraviyoza los konsejo de partisipar a este viyaje. Ya puedesh telefonar al Şalom para tomar informasyones. Este dia van a topar mizmo la okazion de vijitar las tres meshkitas: Selimiye, Eski Camii i Üç Şerefeli Camii. Kale saver ke Selimiye es la ovra la mas reushida del Arkitekto Sinan (Mimar Sinan).

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın