Noah

Estos son las jenerasyones de Noah. Noah varon custo prinismo fue en sus jenerasyones. Kon el Dyo kamino Noah. La perasha de Noah nos enbeza ke en la epoka ke bivyo Noah toda la cente eran malos i non buenos. Solamente Noah fue una persona custa i buena ke kamino en kamino del Kriyador. Shelomo Ameleh dize; bien aventurados son los ijos de los Tsadikim de las personas custas.

El Tsadik verdadero, todas las echas ke el aze las aze a nobre del Kriyador. I no por mostrar a la cente o por komprar grandeza, dizyendyo yo so patron de Tsedaka, yo ago syempre bienfezensyas. El Kriyador aborese a la cente ke todo lo azen por grandeza. El menesterozo ke toma ayudo de personas semejantes se arejistran i no pueden salir delantre la cente. Cente ke son patron de grandeza kavzan rejistro a el menesterozo ke toma ayudo de el por kavza ke lo konta a la cente i de mas ke la grandeza es una manya muy feya. Viyendo a la perasha, ke nos konta ke Noah fue una persona custa, i prinismo ke andava en kamino del Dyo. Noah todo lo ke aziya lo aziya kon custedad i era komplido en su korason, ke su korason era atado kon El Kriyador. En el primer verseto de la perasha el nombre Noah esta repetado tres vezes: Estos son las jenerasyones de NOAH. NOAH era persona custa. NOAH andava en el kamino del Kriyador. Esto sinyefika ke Noah vido el estado bueno del mundo, las sivdades, las kalejas, i las plasas, un mundo manyefiko. Despues vido la destruisyon del mundo por kavza del deluvyo ke trusho el Kriyador. I el Kriyador le amostro despues del deluvyo ke renuvelo el mundo. Dizen nuestros savyos ke Noah fue ombre custo en un tyempo ke toda la cente eran negros i malos. Si el biviya en la epoka ke bivyo Avraam Avinu, no iva ser tan konsiderado. Ma ay dizyentes entre tanta cente non buenas ser custa amostra ke era fuerte en sus sintimyentos.

Noah en azyendo la arka ke le enkomendo el Kriyador estava doktrinado a la cente ke tornaran en teshuva, ke se arepintyeron de la malisya si no ke el Kriyador va destruir el mundo ma no fue sintido.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın