Viajar en los ‘Bayrames’

Silvyo OVADYA Köşe Yazısı
30 Eylül 2015 Çarşamba

Dospues de Rosh Ashana, Kipur i Kurban (puedemos dizir la fiesta del kodrero de los Muzulmanos) i antes de Sukot tuvimos unos kuantos dias ande no tuvimos ni echos ni eskolas. I profitando de estos kuatro dias o mizmo sinko dias - para los ke no son djudios - todas las grandes sivdades embiyaron sus sivdadinos a las kampanyas, a los lugares serka de la mar i mizmo a los paises estranjeros. Savemos ke no se topa bilyetos de otobuses en Turkia para ir de una sivdad a la otra. Mizmo se topa muy yuch biletos de aviones para ir a las islas gregas, a la Evropa (İtalia, Fransia, Espanya o Portugal son puede ser los paizes los mas vijitados en este Bayram). Devesh de merkar los bilyetos mezes antes o azer vuestro viyaje kon una kompaniya turistika. No se si lo savesh ke ay dias ande en el aeroporto de Atatürk (anyos antes se yamava el aeroporto de Yeşilköy) ay serka de mil i kuatro syentos aviones ke abashan i ke bolan; es la mizma koza para el aeroporto ke se topa en la parte asiatika de la sivdad ande tenemos serka de mil i sien bolos - ir o vinir - al dia. Ke no vos pareska ke esto se realiza kada dia. Es en enverano i en dias de fiestas. Ya se ke ay munchas personas de muestra komunidad ke preferaron de ir a Israel en estos dias de vakansas.

Antes d’el Bayram tenemos un medio dia ke yamamos “arba del Bayram” - arife – ke este anyo era el dia de Kipur. I la djente se fueron a viyajar el primer dia del Bayram.

Kreo ke meldatesh en las gazetas ke doz desgrasyas toparon lugar en la Arabia Seudit kuando los muzulmanos estavan en el pelerinaje (hac). La primera era ke un vinch kayo ensima de las personas porke no estava rezyo. I mas de syen personas fueron matados kon este vinch. I en el Bayram mas de setesyentas personas toparon la muerte kon la djentoria egzajerada ke se topava aya. I malorozamente munchas personas fueron pizadas por las otras personas. Esto se ve kada kuatro o sinko anyos porke dainda no reusheron a azer una buena organizasion.

Dospues ke pasi el dia de Kipur en el Kal de Neve Shalom, djueves amanesiendo mos fuimos a l’aeroporto para partisipar a un viyaje de “gourmet”. Tengo un amigo ke me dize “yo so gourmet (persona ke se entiende de komer) i “gourmand” (es un biervo en fransez ke sinyifika una persona ke kome muncho – obur). Este tur era organizado a la Italia en la rejyon de Toskana ke es renomada por sus vinos. Ken puedia pensar anyos antes ke se puede organizar tures de gastronomia para bever diferentes djeneros de vinos blankos, kolorados mizmo rozes produsidos kon diferentes uvaz o el kupaj (karışım-kesme) de siertas uvaz. Mizmo bever Proseco ke es el nombre ke se da por las shampanyas ke se produsen en la Italia. En Turkia mizmo si la fabrikan de la mizma manera no tienen el derecho de emplear el biervo “shampanya o prosecco” para el vino kon gaz. La Italia no reusho komo los fransezes ma munchas personas pasaron sus vidas para azer el mijor vino i tuvieron grande suksesos. Es este modo ke ganan muncho en vendiyendo un vino konosido en el mundo. No es de kreer ma los Italyanos – ke son anchikos - azen sus posivles para ke sus vinos sean produsidos de la mizma manera kada vez. Este modo el vino es renomado. Komo muestro giador (rehber) era somelie (persona ke se entiende de los vinos mizmo te dizen ke anyo fue realizado este vino i kon ke djenero de uvas). I te dizen kualo deves de preferar kon tal o tal komida. Es un echo muy karishik. Ma devesh de saver ke mizmo en Estanbol (puede ser mizmo en Turkiya) en los restoranes “a la hauteur” (shik en fransez) se topa somelies para dar konsejos – i de vez en kuando preferan de konsejar uno de los mas karos. Kuatro dias “komer, bever i el k..o al Kalafat’’. La Toskana es una rejyon de la İtalia ke es todo vedre kon los arvoles de azitunas i las vinyas sin fin.

Voz konsejo de azer este viyaje si no tenesh problemes de kolesterol, de albümin o de diabet. Si no en tornando a Estanbol kale azer analizes i vijitar el mediko para tomar konsejos ke no se van aplikar. Lunes empesimos a komer salata en el echo i kalavasas eskaldadas en kaza en beviendo agua mizmo si estamos en Sukot.

Hag Sukot sameah.