Maccabiat 2015 en Berlin

Maccabiat 2015 en Berlin

Antes una semana un grupo de 120 esportivos (sporcu), kon vente dirijentes se fueron a Berlin, por dyes dias, a los Maccabiates.

La seremonia de avyertura (açılış töreni) fue en el stadyum de los Olimpiates en Berlin, ande aviya 2.500 djudyos de 40 paises diferentes del mundo entero.

La trupa (kafile) turka partisipo kon140 personas. El grupo turko partisipo en las seksyones de basketball, tennis, futsal, futbol, natasyon i otras branshes (dal) diferentes.

Maccabiat es el olimpiyat ke arrekoje a todos los esportivos djudyos del mundo entero.

Komo en el anyo 1972, en los Maccabiates de Munih aviyan matado11 sportivos israelyanos, la sekuritad estava syen por syen. 2.500 djudyos en el mizmo otel fueron guadrados kon una sekuritad entansiva (yoğun).

La Turkiya partisipo kon tres grupos de futsal a estos djugos.

Futsal es; el football ke se djuga en un salon serrado.

Los ke partisiparon mos kontaron ke en la seremoniya de la avyertura; ver a 2.500 personas en pyes dizyendo la ‘Hatikva’ delantre el primer ministro de la Almanya fue muy emosyonante.

Noche Shabat dizir el Kidush todos endjuntos fue tanto reushido ke este evenemento va pasar al livro ‘Guiness’ komo un rekor en el mundo, de azer el kidush kon muncha djente.

Partajar munchos rekuerdos (anı) kon diferentes esportivos del mundo entero, la kerensya i los trokos (değiş tokuş) entre eyos de las vistimyentas appropriadas a sus paises, izo aserkar los partisipantes  los unos kon los otros.

Esto es; una forma de amigable, de amistad ke se kreye entre eyos.

Es una grande eksperyensa para estos mansevos de asistir a estas kompetisyones (yarış) ke partisipan los paises del mundo entero.

Aki; kale dar emportansa al apoyo (destek), ke da esta organizayon de Maccabiat de Estambol.

Kale remersyar a los dirijentes ke estan puedyendo azer kontinuar kon grande ahadu, la partisipasyon de los esportivos, malgrado esta situasyon ekonomika ke toko a todos.

El grupo turko fue reushido en las branshes football,  ganaron dos medalyas de plata, en el tennis mi ermano gano una medalya de plata, i dos otros medalyas de bronzo. En diferentes djugos ganaron medalyas de bronzo.

Kero remersyar los dirijentes de la organizasyon; i en esperando ke se puedan iyir syempre a estas kompetisyones i ke tornen kon reushitades i guste, para aunar las mansevas i a los mansevos djudyos, para atarlos fraternalmente (kardeşçe).

Fue una semana kondansada kon el komer de midi de los retretados (emekli) en la koloniya de Burgaz. 70 personas partisiparon a este dia para pueder komer un ‘Döner’ kosher kon los ijikos ke se kedan en la koloniya para pasar el enverano.

En primero el Grande Rabino Rav Haleva avlo en la Sinagoga de Burgaz; i de detras el presidente de la komunitad djudiya İshak İbrahimzadeh en dando a entender lo ke puidyeron realizar en estos tres anyos del pueder presidansyal, i lo ke no puidyeron realizar, kon una boz dulse i avlando avagar avagar para ke los de enfrente puedan entender. El dyo a entender; la situasyon de muestra komunitad, las personas ke estan vinyendo por demandar ayuda materyal i moral, sovre  todos los puntos de vista komo la sanedad, la parnasa,  las eskolas ke estan muy karas, la asimilasyon, los  divorsos, los mansevos ke se estan iyindo a otros paises i ke mos estamos aminguando aki, en este pais; i kualo devemos de azer para pueder kontinuar muestra vida, porke somos una komunitad ke mos estamos envyejesyendo de dia en dia.

Despues de la avla del presidente todos endjuntos suvyeron a la tarasa de la koloniya para komer kon grande dezeo el döner i pasar un dia agradavle. Estava una kalor de no pueder rezistir ma en todo kavzo fue un dia reushido de estar akompanyados i entornados de migos para pueder avlar un poko i trokar las ideas.

‘Golden Age’ el grupo de las dammas ke se estan okupando de las personas de una syerta edad, kon el grupo de los retretados para los ombres ke el presidente es Hayim Kampeas; estan organizando evenementos enteresantes para aunar las personas i azer pasarles unas kuantas oras agradavles.

Azlaha i Beraha para los ke estan penando de alma i korason para dar un apoyo a los ke tyenen menester i fuersa buena…

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın