DAVİD KOHEN: El duayen de la segurita

DAVİD  KOHEN:   El duayen de la segurita

La semana pasada eskrivi unos kuantos biervos sovre el kal de Heybeliada i mizmo vos ize konoser todos los personajes ke sirven esta sinagoga. En eskrivyendo el artikolo pensi ke devia de azer konoser los ke moran en Heybeli. El segundo gabay de este kal es el sinyor Sami Tovim i kada semana aze su posivle para servir los yahides ke vienen. Aze lo mizmo en invierno en el kal de la Mahazeke Tora en Şişli. Toma un grande plazer en ayudando los yahides ke vienen a la sinagoga.

 

 

Esta semana esto meldando un livro – una biografiya (savej ke agora no ay biografias o otobiografias; i la djente preferan ke un buen eskrivano o un jurnalisto aga un buen roportaje kon el o kon eya i es mas fasil de eksprimarse de esta manera) kon el senyor David Kohen ke es un ombre de grande valor i su famiya fue ay mas de sienivente anyos en los echos de segurita. Kuarenta, kuarenta i sinko anyos antes kuando me iva a la botika de mi padre avia personas reelmente viejos ke vinian kon una chantika para trayer una policha de segurita – por las kazas – i tomavan reelmente unas kuantas liras por este echo. I eyos tomavan solo una chika partida de este montante. I pensava komo esta djente se puedian mantener. Todos eran “Mösyös” kon kostum, kravata i chapeo. Los miembros de la famiya Kohen fueron mas kapaches i fueron unos de los mas respektuozos en este echo. Savemos ke el sinyor David Kohen tiene una koleksiyon ancha de dokumentos i firemarkes sovre la istoria de la segurita en el Imperio Otomano i en la Turkiya i estos dokumentos fueron el sujeto de una ekspozisyon en el Muzeo de la Banka Otomana.

El papu ke tenia el mizmo nombre nasido en 1865 en Salonika tuvo el mazal de ir a la Fransia i se ambezo ke avia un echo ke se nombrava “adjenta de segurita”. Oy en dia ay muevos biervos “Broker de Segurita”; reelmente viene mas riko al oyido… Puedeser no es la mizma koza ma azen el mizmo echo. El papu ke tuvo un grande sukseso fue nominado komo direktor jeneral de la kompanyia de segurita almana Viktoria de Berlin en Fransia. El era direktor de la mizma kompanyia en el Imperio Otomano. En el tiempo de Hitler, el papu i los dos onkles pyedreron sus echos. El papu direktor de Fransia i del norte d’Afrika; el tiyo Raymond Kohen direktor de la mizma kompanyia en Ejipto i el tiyo Maxim Kohen ke era direktor en Romaniya fueron echados de sus echos porke eran djudios i la kompania era Almana komo se entiende del nombre.

El sinyor Kohen esta muy orgolyozo porke su inyeta esta en el mizmo echo i esta endikando ke no es muy fasil de topar un echo o una kompanyia ke sea dirijada por sinko jenerasyones de una famiya. Es muy djusto porke en muestro pais ay unas kuantas kompanyias ke tienen una istoria mas vieja ke dosyentos anyos i el primer egzempyo es Hacibekir, el primer ke izo por la primera vez la produksion de los bonbones de kada kolor “akide” i de los “lokumes –turkish delights” dospues de la envension de la nishasta -kornflor. Los lokumes oy en dia dainda es una dulsurya ke semboliza la Turkia. En siertos livros esta eskrito ke es el mizmo ombre ke izo los masapanes; ma kreo ke no es djusto porke los Edirnelis tienen el masapan -badem ezmesi muy famozo i dizen ke se ambezaron de los djudios ke tenian el uzo de azer masapanes mizmo en la epoka ke vinieron de la Espanya.

Davit Kohen en su livro mos esta kontando sovre la istoria de la segurita en muestro pais. Mizmo mos esta kontando ke munchos Ermenis en el empesijo del venten siglo izieron seguritades de vida (hayat sigortası) i era muy enteresante para esta epoka. En el mundo el ofisio de segurita empeso kon el transporto de los vapores. Komo se ivan a largas distensias devian de azer la segurita de la ropa ke estavan mandando. Komo el Imperio Otomano no tuvo un sukseso emportante en las mares i los maritimos otomanos no reusheron a pasar el estrecho de Gibraltar (Cebelitarık Boğazı) la segurita vino muy tadre en estas tierras. El Sinyor Kohen mos esta kontando los problemes ke bivieron kon su padre en los anyos de la sigunda Gerra Mondial.

En el Muzeo Djudio Otomano Turko devemos meter a lo manko una fotografia de esta famiya (el papu kon sus tres ijos todos direktores de una kompania de segurita) porke reelmente fueron los pionaryos de este ofisio.

Su ija Dalia, su yerno Marsel Kohen i sus inyetos Selin i Dani fueron muestros vizinos en la Büyükada i eramos muy buenos vizinos. Oy en dia son muestros “brokeres” en una partida de muestros echos.

Nota: Sigortacılığın Duayeni: DAVİD KOHEN - Sigortacı bir ailenin beş nesillik serüveni; Birant Yıldız; Literatür Yayınları

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın