Devarim

Ansi enpesa la perasha ‘Devarim’, ke es el enpesijo de el sinken livro de la Tora.Estas son las palavras ke avlo Moshe a el puevlo de İsrael. Son palavras de kastigeryo. Moshe Rabenu en sus diyas de alkavo, kastigo a el puevlo Djudyo, en la yanura de el Yarden.

El les izo akodrar los yerros ke izyeron entervalo de kuarenta anyos en el dizyerto.

Los diyas ke vinyeron kontra El Kriyador, ke disheron mijor era de murir en Mistrayim, ke de vinir a este dizyerto. Ke sirvyeron el idolo de Peor. Ke disheron a Moshe rabenu no ay simiteryos en Misrayim, ke nos trushites por murir en el dizyerto. Voz keshates por la manga ke vos dyo El Kriyador, por mantanervos izitesh el bezero de oro.

Les aze akodrar Moshe Rabenu el yerro ke izyeron los eskulkadores de avlar mal por la tyera prometida. Moshe Rabenu todos estos kastigeryos los izo a el puevlo Djudyo sekretamente. No los kijo azer averguensarlos de la estima ke teniya verso el puevlo Djudyo. Ma despues vemos ke  Moshe Rabenu klaramente les aze akodrar los yerros ke izyeron el puevlo entervalo de los kuarente anyos ke estuvyeron en el dizyerto. Dizen nuestros savyos, la persona ke aksepta i desha a su pekado, este pekado se le aze merito. Moshe Rabenu ke konosiya muy bien a su puevlo, ya entendyo ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moshe Rabenu ekspliko la Tora entera a el puevlo Djudyo malgrado ke ya avian sintido en el Monte Sinay. Moshe rabenu tuvo menester de repetarla a los ke nasyeron en el dizyerto, a la jenerasyon nueva no aviyan sintido en el Monte de Sinay, de boka de El Kriyador, si no ke eyos sintyeron todos estos evenementos de boka de sus jenitores. Malgrado ke la jenerasyon nueva teniya una grande fey i kreyensa, Moshe Rabenu tuvo el menester de eksplikarles el mismo.

Moshe Rabenu disho a el puevlo Djudyo: “El Kriyador enkomendo i disho basta agora ke estuvites lado el Monte de Sinay. Ya afirmatesh munchas enkomendansas, ya resivites la Tora, ya fraguates el Tabernaklo, ya formatesh el sanedrin el Tribunal. Agora kamina a delantre. Agora vos se esta avriyendo el kamino de la tyera prometida”.

Moshe Rabenu eskojo i tomo el biervo DEVARİM por el enpesijo de la perasha, mismo biervo Devarim la sinyifikasyon es bizbas, komo las bizbas nos dan miel ke es dulse, i la Tora nos adulsa a nozotros, i es vidas para nozotros. Komo es dicho “arvol de vida es a la ke la sostyenen, i todos ke sostyenen a la ley son orozos”.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın