Devemoz de rengrasyar el Sinyor Güleryüz

Kreo ke la mas grande partida de los lektores del Şalom, partikolarmente los lektores ke meldan los artikolos eskritos en djudeo-espanyol konosen el Sinyor Naim Güleryüz ke reusho a publikar su livro “La İstoria de la Prensa Turka Djudia” (Türk Yahudi Basın Tarihi).  El livro fue publikado por la Kaza de Edisyon Gözlem ke apartiene al Şalom.

Malorozamente el livro fue publikado solo en turko. Ma komo una grande partida de estas gazetas i de estas publikasyones fueron publikadas en judeo–espanyol puede ser devemos de publikar en esta lingua solo las publikasyones i las gazetas ke fueron publikadas en djudezmo. I si keremos ke los istoryanos ke son enteresados sovre la prensa djudia turka profiten de este livro solo en turko nova ser bastante para eyos; van a kerer ke sea publikado a lo manko en inglez.

El livro del defondo Nesim Benbanaste era kreo uno de los primeros livros ke fueron publikados sovre esta prensa. El sinyor Moşe Grosman en su livro Marcus mos enformo sovre la prensa Djudia turka ma kreo ke el sinyor Güleryüz izo un lavoro muy reushido a este sujeto.

Güleryüz esta analizando la prensa djudia de muestro pais en sesh diferentes epokas: 1842-1876; 1876-1908; 1908-1923 (La fondasyon de la republika Turka); 1923-1946 (De la Republika fina el rejim de munchos partidos politikos); 1947-1984 (La epoka ande siertos periodikos empesan a ser publikados en turko); i para eskapar del 1984 fina muestros diyas.

El sinyor Güleryüz mos esta dando enformasyones sovre todas las publikasyones ke fueron emprimadas.  I mos esta aklarando sovre la mas grande partida de los djornalistos ke publikaron estos periodikos. Ya se ke no es muy kolay de eskojer las personas. Ma kero dizir ke ya konosko muy bueno la epoka del muevo Şalom ke empesa en 1984 (ay 31 anyos).  Ay siertos djornalistos ke eskriven kada semana desde vente anyos i malorozamente no son mansyonados komo jornalistos. Oy en diya el Şalom poseda a lo manko kinze o vente eskrivanos ke eskriven artikolos kada semana.  Kuando me esparti de la direksyon del Şalom komo editor del semanaryo (1998 – ay disesh anyos) avia siertos eskrivanos ke kontinuan a eskrivir ma no fueron mansionados komo jornalistos. Mizmo siertos eskrivyeron siyen vezes mas de los ke publikaron solo unos kuantos numeros de una gazeta.

El Sinyor Güleryüz reelmente dyo una buen dechizyon en deshando la responsabilidad del Muzeo porke topo mas muncho tiempo para finalizar todo lo ke arekojo anyos enteros. Sus livros sovre los Djudios de Gaziantep i de Edirne son las frutas de esta dechizyon. Esperamos ke kontinue a publikar livros muevos.  Vamos a topar la oportunidad de ambezarmos mas sovre los diferentes sujetos sovre los djudios ottomanos i turkos.

En su livro Naim esta kontando sovre mi. No vos pareska ke eskrivi este artikolo para rengrasyarlo ke eskrivyo un artikolo sovre mi. Eskrivi este artikolo para ke se sepa ke un livro asemejante fue publikado. Esto arrengrasyando el sinyor Naim Güleryüz por su lavoro.

Si keresh merkar este livro, el Şalom esta pronto para vender i embiyarvolos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın