El enverano en la Isla Burgaz

El enverano en la Isla Burgaz

Burgaz es la tresera isla komo grandor entre las islas de Prens (Prens Adaları). Es redonda komo forma i su anchura es dos kilometros.

Su nombre en grego es Antigoni.

Sait Faik Abasıyanık es un eskrivano famozo de la literatura turka ke bivyo en BURGAZ un syerto tyempo de su vida. En todos sus kuentos (hikaye) eskrive las kuatro islas spesyalamente Burgaz.

Su kaza agora es un muzeo enteresante ke munchos turistos la vijitan.

El panorama de Burgaz es maraviyozo; de una parte la isla de kuchara (Kaşık adası), de la otra Halki ke es yamada Heybeli ada, de la tresera parte las sharas de pinos (çam ormanları), los bodres de mar i las kazas de tavlas elegantes.

Kalpazankaya es un kafe restorante famozo entre las sharas, kon su panorama ande se puede ver el nasimyento i la puesta (gün batımı) del sol.

El sanatoryum de Burgaz se fondyo en 1928. Es uno de los mas vyejos del pais.

Malorosamente oy ay muy pokos gregos en esta isla, todos se fueron a la Gresya.

Ma; unos enamorozos (aşık) ke tyenen la nostaljiya de aki i no vendyeron sus kazas; vyenen a pasar el enverano. Aki, los djudyos son nombrozos.

En el anyo 2003 un dia de Kipur; un fuego muy grande kemo munchos arvoles, kaji la miyatad de las sharas en la isla malorosamente.

Fue un dia inolvidavle para mozotros los djudyos ke estavamos orasyonando en la Sinagoga de Burgaz.

Las Sefer-Toras en las manos de los mansevos, no supimos ande guadrarlas para ke no se kemen.

Enfin, el Dyo Baruhu metyo su mano i el fuego se amato kon muncha difikultad porke aviya un ayre loko.

En Burgaz ay vendedores de peshkados, solamente dos magazenes ke venden frutas i legumes, 5-6 bakkales, 15 arabas kon kavayos, 2 farmasias, un doktor solo en enverano, 6-7 restorantes en el bodre de mar, unos kuantos kafes, dos klubes ande las famiyas pueden entrar a la mar, un vendedor de agua buena, un kuaför, una vez a la semana ay un bazar ke se vende frutas, legumes naturales (doğal), un vendedor de djugetes…

Es komo un kazal chiko, ande todos se konosen, se saludan i se avlan.

Un lugar familyal; ke todos los moradores estan en koryente de los sujetos ke se pasa de bueno u de negro entre las famiyas.

Fina el anyo 1953 no aviya meskita. Despues se konstruizo una chika meskita. Ay 4 eglisyas de los Ortodokses i Katolikes, kon una sinagoga chika.

Burgaz es un paradiso, la mas kalma de las islas kon el aver limpyo, las flores, las personas i el entorno.

Ay munchos artistos (sanatçı) ke biven en invyerno i en enverano aki. Es una isla “kozmopolit” ke kontyene todo modo de djente; rikos, povres, turkos, djudyos, gregos…

Se oye avlar; en turko, ladino, kurdo (kürt), fransez, ingles, alman, ermeni i grego.

Lo ke es emportante en Burgaz; es la trankilitad i la relasyon del puevlo kon los animales (hayvanlar).

Kuando los barkos de los peshkatores arivan al bodre de mar, los gatos, perros, pasharos... se aunan para komer los peshkados. Es ermozo de ver este tablo.

Es un sentimyento yeno de kerensya de bivir esta ermozura.

Keridos lektores; vos oguro una enveranada yena de felisitad (mutluluk) i el Dyo ke mos ayege de pueder vinir kada anyo.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın