Los iftares del mez de Ramazan

Los Muzulmanos kada anyo en el mez de Ramazan deven de azer tanit kuatro semanas (el mez en el kalendaryo de los muzulmanos es komo el mez ebraiko – tiene dar i aver kon la luna). Komo no tiene un mez demaziya kada kuatro anyos (komo el veadar en muestro kalendaryo) el ramazan se va diyes dias atras kada anyo. En kada trenta i sinko anyos es la mizma sezon i los mizmos dias. El ayuno puede ser en el mez de desembre komo el mez de djunio. Este anyo afito en los dias los mas largos del anyo. Se kedan sin bever i sin komer de las kuatro de la demanyana fina la mueve de la tadre. Reelmente no es muy kolay de azer tanit vente i ocho dias en estas kondisyones.

El mez de Ramazan se deve de partajar el bokado i se deve de azer buendades. En la istoria puedemos topar munchos kavzos en los paizes de majorita muzulmana ande los djudios dan pransos de iftar para los muzulmanos para partajar el bokado. En la istoria Ottomana meldamos siertos kavzos. Las komunidades las mas emportantes en paizes de majorita musulmana son el Iran; el Maroko i la Turkia. En los otros paizes de majoridad muzulmana kaji no egziste mas djudios.

No se lo ke se pasa en la Persia i en el Maroko ande tuve la okazion de vijitar dodje anyos antes kon un tur organizado por el JOINT ke reelmente es una organizasyon ke pensa por los menesteres de las komunidades djudias i los puevlos non djudios en difikultades de todas las partes del mundo. Ma konosko lo ke se aze en muestro pais en este mez de pas i de bienfezensia. Ya se ke ay personas de muestra komunidad i personas de sensya (una partida orijinaryos de muestro pais) ke biven en los paizes evropeos o en las amerikas komentan ke los djudios turkanos estan aziendo enshavonaduras a los diridjentes. Kreo ke no es verdad. Anyo entero tenemos dar i aver kon sienes de dirijentes de muestra sivdad mizmo de muestro pais i una vez al anyo keremos agradeserlos. A ken? Al polis ke mos ayuda para la seguridad de muestos kales, de muestra eskola, de muestros klobes. A los responsavles de las munisipalidades ke mos ayudan para las permisiones de las fraguas, para la limpyeza de los simeteryos, i todo modo de ayudo para los edifisyos de muestra komunidad… A los responsavles ke mos ayudan para kombatir para los derechos de los djudios turkanos (para no ser responsavle de las lisyones de relijion musulmana; para no ser responsavle de las kestiones en un egzamen ke enteresa todos los elevos de la Turkia.) Es vedra ke la Turkia es un paiz laik ma kale saver ke mas de los noventa i mueve por sien del pais es muzulmano. I ya savemos ke estos responsavles son ovligados de dar servisio a todos los sivdadinos mizmo si son djudios. Deven de dar todas las permisiones ke son derechas kon las leyes. Ma mi opinion es ke no tenemos dingun danyo de azer este djesto en un pais ande la amistad es muy emportante.

Este anyo la sorpresa era el iftar realizado en las guertas del Ospital Or Ahayim organizada por los Gregos, Ermenis, Suryanis, Djudiıos, Keldanis (un sekto de los Suryanis) Bulgares i Gurdjis-ke son orijinarios de la Georgia –Gürcistan - i ke la mas grande partida son Katolikos. Kada komunidad era reprezentada por los lideres relijiozos komo muestro Hahambashi Haleva; el Patrik Grego Bartalomeos; el patrik Ermeni Aram Ateşyan; el patrik Suryani Yusuf Çetin i otros lideres kristianos ke no konosko sus nombes i sus niveles de reprezentasion. Oyimos los mesajes del Prezidente dela Republika Erdoğan; de los ministros Arınç i Çelik embiyados por esta okazyon. El Sinyor Dr. Adnan Ertem i el governador de Estanbol en sus diskorsos eksprimaron el plazer ke tuvieron en biviendo este evenimiento.

Muestro prezidente oguro ke el proksimo anyo organizaremos un iftar asemejante en la guerta de la iglesia de los Suryanis ke se va fraguar en Yeşilköy.

Yo estava muy kontente de tomar parte en esta nochada reelmente reushida de mi punto de vista…

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın