Şelah Leha

El puevlo Djudyo arivo al luguar nombrado Kadesh Barnea en las kavos del dizyerto de Paran. Arivando a este luguar, ya estavan muy serka de la tyera prometida. En un kurto tyempo ya puedian entrar a la tyera de Kenaan, la tyera prometida del Kriyador, i Moshe Rabenu, por konsolar al puevlo les dize: “Ermanos miyos, ya vos aserkatesh a el luguar ke nos prometyo El Kriyador, mirad ke vuestro Kriyador, ya vos apronto la tyera delantre vozotros. Suvid i apatronadvos de eya sigun la veluntad del Kriyador sin myedo ni espanto de nada.”

Malorozamente el puevlo de akel tyempo no meresyo gozar de la tyera bendicha. I por sus mal komporto se deperdyeron i muryeron todos en akel dizyerto.

Los Djudyos sintyendo estas palavras de Moshe Rabenu, las entendyeron trokadas i pensan ke por endelantre no vana tener mas protejador. I es ke kon sus fuersa i entelijensya tyenen ke suchiguar la tyera prometida. Sovre esto se van todos sin regla ni respekto onde Moshe Rabenu i le dizen, ke keren mandar eyos personas a esta tyera. Por ke eskulken i veyan i ke les avizen kual es el kamino ke vana tomar i kualos son la sivdades ke vana suchiguar, i se olvidan enteramente ke Moshe Rabenu sus pastor Fidel esta kon eyos, i ke esto todo no apartyene a eyos de pensarlo.

El Todo Poderoso topo konvinivle sigun su alto saver de no defenderles esta demanda, i le dyo orden a Moshe Rabenu de desharlos azer su veluntad, solamente ke lo enkomendo ke mandara doce personas onoradas, kaveseras del puevlo, uno de kada  trivo, i ke no fueran i na cente ordinarya, i le enkomendo ke la repuesta i lo ke vana ver ke se la digar a Moshe Rabenu i ke entyenden ke el es sus kapo i rijidor.

Moshe Rabenu izo komando del Todo Poderozo i tomo doce personas uno de kada trivo, i los mando a la tyera de Kenaan, dizyendoles ke eskulkaran la tyera en todos sus raportos, si es buena su klima o no. I la cente de ai ke manera son, si son fuertes o flakos, pokos o munchos, i las sivdades ke moran si son enkostelyados o son avyertas. I les dyo a entender la direksiyon ke tyenen ke tomar.

Los eskulkadores aparte de Kalev ben Yefune i Yeoshua bin Nun, La dyes eskulkadores dyeron un raporto desfavoravle, i kavzaron ke el puevlo Djudyo kedaron en el dizyerto 40 anyos.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın