Beaaloteha

Salyendo el puevlo del dizyerto de Sinay i entrando al dizyerto de Paran enmedyo el kamino ke turo tres diyas, vyendo ke entraron a un dizyerto temorozo, leshos de luguares de moradas de cente, se enpesaran a keshar, topavan ke avlar kontra. Bushkavan razones i achakes para kada koza i koza. Ma El Kriyador ke todo oye i todo save, ya sintyo sus malos pensamyentos, i le desplazyo muncho.

El puevlo arivando a el luguar nombrado Kivrot Ataava, la cente ajena ke estavan kon eyos (erev rav) dezearon unas kozas afuera del menester. Kozas ke no se puedian toparsen mas ke en las sivdades, i no en el dizyerto. İ el puevlo Djudyo sin apartar i saver la diferensya ke ay de eyos a esta cente, tomaron i eyos a yorar dizyendo: “ken nos dyera a komer karne?” İ se enpesaron a rekordar de munchas kozas de muy poka emportansa ke tenian en el Ejipto debaldes myentres ke el mantenimyento ke tenian en la mano ke es la manga era una koza muy estimada en su savor i en su vista, i en su limpyeza. Tinyendo esto en mano no kaliya pensar por unas kozas de muy poka emportansa.

Se rekojeron, kada uno en la puerta de su tyenda famiyas enteras a yorar, por este mal kel es manka todad estas kozas ke teniyan en Mistrayim kon abondansa. La verdad ke esta koza le desplazyo muncho a El Todo Poderoso, komo echaron tan presto sus buendades detras de la espalda.

Moshe Rabenu sintyendo estas todas palavras de el puevlo, se kesha kon El Todo Poderoso dizyendo ke pekados tuve ke me dates esta karga tan pesgada, kaje ke no puedo suportar. El Kriyador le enkomenda a Moshe Rabenu ke eskojga 70 personas de los savyos de el puevlo ke son konpetentes por giyar a el puevlo i El Kriyador les va dar fuersa ke rijan a el puevlo i ke le alivyanen el yugo de Moshe Rabenu. I Moshe Rabenu rekonto al puevlo el orden del Todo Poderozo i eskojo 70 personas de los savyos de el puevlo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın