Puedemos ser mas demokratikos?

En primero kero avlar sovre la demokrasia en muestro pais; el pais ande bivimos ke es la Turkia i ke se avla kada dia de la demokrasia. Si se avla kada dia no es porke esta maraviyoza ma porke el puevlo i siertos politikos keren ke sea reelmente demokratika. En la istoria de muestro pais vimos 3-4  revolusyones o tentativas de revolusyones (los yamimos revolusyones post modernos o dar un ayar a la demokrasia). Ay dos dias ke el jeneral ke izo la revolusyon en el anyo 1980 en una situasyon del pais ande kada dia se muriya dizenas de mansevos i elevos de universidades en las kayes; se matava jornalistos i personas de sensya reelmente sin razon. Mizmo mi profesor en la Universidad Teknika d’Estanbol, el Profesor Ordinaryus Karafakioğlu ke era una personalidad reelmente muy presyozo i era el dekano de la fakultad d’elektisita fue matado en la kaye reelmente sin razon.

I kuando se realizo la revolusyon el 12 de Septembre la majorita del puevlo estava muy kontente de la situasyon i de la fin de la anarshia. Mizmo la mueva konstitusyon i el muevo prezidente de la Republika ke era la personalita la mas emportante de la Revolusyon fueron aprovados kon mas de 91%. I kale dizir ke no tuvimos dinguna presyon en el referandum.

No pensesh ke so un fashisto i no kreo ke la mijor manera para kontrolar la situasyon es la revolusyon de la armada. No so de esta idea i kreo en la demokrasia mizmo si de vez en kuando da rezultados muy terrivles.  (En el anyo 1991, la Aljeria por la primera vez realizo las eleksyones kon munchos partidos politikos. La partisipasion fue solo de 20% mizmo si los raportos ofisyales dizian ke era de 42%; kale saver ke el partido relijiozo ke reusho a ganar los 50% de los 20% = 10% i dospues mataron sienmiles de personas durante  anyos).

Vos kero dizir ke no fui enkantado kon la personalidad  del jeneral Evren. Ma en la prensa todos los ke lo alavavan agora se estan kedando leshos. Kero felisitar el jornalisto Ertuğrul Özkök del diaryo Hürriyet ke fue objektivo kon su artikolo. Amanyana dingun responsable de un partido politiko va asistir a los funerales porke no es muy demokratiko  de  tomar lugar en una seremonia komo esta.

No se si en muestra komunidad semos reelmente demokratikos? Kreo ke este konsepto es achetado komo en el pais. Ay siertos ke pensan ke la demokrasia es komo un otobus i puedes abashar kuando no tienes mas de menester. Ya savemos ke mizmo Hitler vino al poder kon eleksyones.

Para muestra komunidad la Fondasyon fondamental es la del Rabinato. I ay munchos anyos ke el ke es Prezidente de la Komunidad Djudia de muestro pais es en mizmo tiempo el Prezidente de esta Fondasyon. Si organizamos en mizmo tiempo estas dos misyones todo el puevlo va entender ke las eleksyones de la fondasyon es en mizmo tiempo la eleksion de la prezidensia i de los miembros del Egzekutivo. Para ke los miembros de la Komunidad partisipen a todo modo de aktivitades devemos dar mas muncho la palavra a estas personas i los ke dezean pueden ser kandidatos para ser miembros konsejeros al Gran Rabino. Bivir i ver. La luz esta aklarando el kamino de la Demokrasia en muestra Komunidad.

Kreo ke vos va dar muevos detalyos en poko tiempo para estos progresos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın