La avyertura de la Grande Sinagoga de Edirne

Un dia yeno de emosyon i de orgolyo

Onze anyos antes kuando pensimos la restorasyon de la Grande Sinagoga de Edirne no se kuantas personas entre las 1000 personas ke vinieron para la avyertura de esta maraviyoza sinagoga estavan dakordo para estos esforsos.

Mierkoles el 25 i djueves el 26, Edirne rebivio sus dias pompozos (şaşaalı). Mierkoles es kon grande emosyon ke me fui en manko de dos oras d’Estanbol asta Edirne ande los diridjentes de muestra komunidad estavan aziendo todas las preparasyones para el grande dia. Ya tuve el mazal de asistir a la orasyon del Arvit. Dospues de la orasion  los ke asistieron baylaron i kantaron para mostrar sus emosyones.

Kale ke sepash ke Edirne no es Andirne i tenesh el mazal de topar oteles luksuozos de sinko estreyas i butik oteles – komo es la moda – ke se transformaron de kazas i konakes d’al tiempo. Djueves estavamos en el dezayuno kuando mos vino haber ke los primeros sinko otobuses alkansaron a la Sinagoga. Kuando arivimos la sena era reelmente eksepsyonel. Un edifisio grandiozo kon sienes de personas ke vinieron para la tefila. Todos kon talled i tefilin.

En primero fue el hazan-haham Azuz ke empeso la orasyon. Ken era este sinyor. El era el rabino d’alkavo ke estava en la sinagoga de Edirne entre los anyos 1965-69. El d’alkavo fue el primer. Dospues de la tefila realizada kon la partisipasyon de todos los prezentes se empeso a kantar i a baylar. Las mujeres ke estavan en el segundo etaj partajaron  esta emosyon i partisiparon a los bayles.

Avia munchos envitados de todas las partes del mundo, munchos Edirnelis ke vinyeron de İsrael i otros paizes. Partikularmente para eyos era la topadura de kosfuegros. La Meshkita de Selimiye era el monumento ektraordinaryo ke vijitimos dospues de la tefila. Reelmente ke es una maraviya esta ovra del famozo arkitekto Sinan. El simeteryo djudio de Edirne ke se topa serka del sentro –oy en dia es en la sivdad –ma malorozamente la maz grande partida  fue destruida i se topa apartamentos i la Universitad de Trakya en estos kampos fue vijitado por la asistensya ke vinyeron a Edirne. Kuando vinimos  estava enterasente de ver dospues anyos, reshas (çit) en el doredor del simiteryo ke mos kedo. (Kreo ke es solo el un dizen del simiteryo orijinal.) Todos estavan bushando sus paryentes para echar una echkava. (Avia munchos hazanes kon mozotros). Los dies otobuses d’alkavo (eran 20 otobuses ke vinieron d’Estanbol) alkansaron al simiteryo; el aspekto era eksepsionel. El prezidente me dio la onor de avlar unos kuantos biervos sovre la istoria de esta sivdad i sovre la kronolojia de la restorasyon. Echimos mizmo una ashkava para los soldados ke se murieron en la Gerra de los Balkanes. (El 26 era el dia de komemorasyon).

Dospues ke se komyo komidas kasher ke vinieron de Estanbol o ligados (ciğer) i keftes ke se komio en los restoranes de Edirne (ligado es una spesialidad de Edirne ke se kome asado si es de kodrero i frito si es de vaka). 

 A las doz empeso la Seremonia ke l’astavamos asperando kon grande emosyon i kuryozidad. El ayudante del Primer Ministro, Bülent Arınç; el governador de Edirne ke avia avlado siertas kozas sovre mozotros ke no eran muy kasher kuando los soldados Israelyanos entraron en la meshkita en Yerushalayim i el prezidente de la munisipalidad ke mos resivio a Edirne kon las pankartes ande estava eskrito “Muestros antiguos (para no dizir viyejos)  vizinoz; bienvenidos a vuestra kaza” i el direktör de la direksion de las fondasyones ke es reelmente muy emportante para las minoridades relijiozas ke tienen todos sus edifisios ande el patronaj de esta direksion. El Sinyor Arınç fue resivido kon palmas  dospues de sus deklarasyones de los dias dalkavo.

La Sefer Tora entro en la Sinagoga debasho de la hupa transportada por kuatro mansevoz. Supito una dizena de shofares ke empesan a sonar. I muestro presidente avriyo la puerta del Ehal a Kodesh vaziyo kon la Sinyora Roza Yahya ke era la madre del defondo dentisto Yasef Yahya ke fue matado por los terroristos solo porke era Djudio en el anyo 2003. Un chorro de sentimientos  i lagrimas por los ke savian kualo sinyifikava este djesto (Roza Yahya es Edirneliya i Yasef termino el liseo en Edirne). Dospues ke la Tora entro kon kantes en la Keila, el Grupo de Maftirim mos kanto unos kuantos kantes liturjikos. (Los maftirimes son kantes liturjikos kompozados en makames de muzika  turka i ke se kantan dias de Shabat sin enstrumentos. Esta muzika i los kantes fueron desvelopados en Edirne).

Los partisipantes fueron reelmente muy emosyonados kon la avla de muestro prezidente İtzhak İbrahimzadeh. Munchas vezes su avla fue interrompada kon palmas porke avlo todo lo ke pensava. Estos biervos  izo plazer a los partisipantes. Avlo del antisemitizmo; avlo de los derechos de los djudios ke son kompatriotes iguales, i demando deke semos ovligados de kontar kada vez lo ke izimoz por muestro paiz kuando avlan kontra los djudios de muestro pais; disho ke keremos kel biervo de minoridad se troke al biervo de kompatriot. I rengrasyo al prezidente de la republika ke preparo muevas leyes para dar atras los edifisios ke apartenian a las minoridades. La avla del Ayudante del Primer ministro fue muy apresiada . El avlo de los derechos de los non muzulmanos de la istoria de los djudios i de siertos indjustisyas ke bivimos en la istoria de la Republika Turka i de los djudios ke toparon i ke no toparon abrigo en esta tierra durante la segunda gerra mundial…

El dia topo fin kon la vijita de la ekspozisyon de fotografias organizado por el sinyor Niso Kaneti (ke bive en Israel) i sus amigos i un kokteyl riko ofrido por la Komunidad d’Estanbol.

Oy kuando estava eskrivyendo este artikolo sovre Edirne, Karen me prometyo ke puedo eskrivir mas en el Amaneser en un mez.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın