El marso de 1915

El anyo 1915 fue un anyo yeno de evenimiyentos para el Imperio Otomano. Uno de los mas importantes es el ke afito kon los Ermenis. Puedemos oyer reelmente diferentes versyones sovre este evenimiyento. Poko o muncho todas las versyones son kontra la politika del Imperio Otomano mizmo si tenian razon sovre sus punto de vista. El mizmo anyo un otro evenimiento es la Gerra de Çanakkale (Dardaneles), sivdad i estrecho (bosforo) entre la mar de Marmara i la Mar Egeo. Esta sivdad se topa en dos kontinentes, Evropa i Asia, komo Estambol. Ya savesh ke todos los paizes tomaron parte en esta gerra: soldados de Australia; Mueva Zellanda; Inglatiera; Alemanya i todo modo de paizes.

Oy en dia, siertos diaryos i revistas estan eskriyendo artikolos sovre esta gerra ke fue los primeros pasos de la Turkia moderna i el primer trionfo emportante de Mustafa Kemal (Atatürk) fondador del muevo estado turko. Entre estas revistas, siertas avlan de los djudios ke gerreyaron kontra los turkos. Esto no es djusto porke ya puedesh topar en el simeterio djudio de Yeldeğirmeni (Haydarpaşa-Estanbol) un lugar ande se topa tombas de los djudios otomanos ke se murieron en la gerra de Çanakkale. Ya savemos ke ay djudios fransezes, inglezes, austalianos ke kombatieron kada uno para su patria ke era lo djusto.

Deke estos artikolos kontra los djudios. La razon es porke la primera armada djudia en la istoria era “el rejimento de las mulas del sion” (Sion Katır Alayı). Estos 562 soldados djudios, la mas grande partida orijinarios de la Rusia gerreyaron kon los Inglezes kontra los Turkos. Los 562 soldados djudios no era una kuantitad muy emportante entre kaji un milion de soldados ke gerreyaron en los Dardaneles. La emportansya era ke mostraron al mundo ke los djudios puediyan ser soldados i esto kontinuo fina la fondasion del estado de Israel. En la Primera Gerra una partida de los djudios ke no tenian la nasyonalidad Otomana fueron embiyados por Cemal Paşa a Mitsrayim (Mısır). En Aleksandria (Iskenderiye) i serka de esta sivdad, mas de 18.000 djudios sionistos toparon refujyo i empesaron a bivir en los kampos . Los djudios ejipsianos los ayudaron. I es aya ke formaron este rejimento (müfreze- alay). De ke el rejimento de las mulas? Porke para kaminar tenian 600 mulas. Ken devia de ser el komandante de este rejimento. A la fin desidaron ke John Henry Petterson va ser el komandante i Joseph Trumpeldor sionisto, ruso ke kombatio en la armada Rusa kontra los Japonezes en 1911 i pyedro un braso en la gerra fue el segundo komandante. Una otro personaje emportante era Vladimir Zeev Jabotinsky ke no partajava la mizmas ideas kon Trumpeldor ma le dio razon dospues del akto de Çanakkale.

Ya puedo kontar mas muncho sovre estos djudios ke tenian la estrea de David en las yakas. Oy puedemos topar unas kuantas tombas de estos soldados ke se murieron en Çanakkale. Mi konsejo es de meldar el artikolo de muestro amigo Denis Ojalvo publikado en el Shalom tres anyos antes ma malorozamente solo en turko.

Oy en dia el Muzeo de los 500 anyos esta aparejando una ekspozisyon sovre los soldados djudios ke kombatyeron en la armada Turka. Si tenesh parientes o konosidos ke fueron soldados en esta gerra estamos asperando vuestras enformasyones.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın