Las Relasyones kon los representantes del Governo

Munchas personas de vez en kuando kritikan los rezultados de las relasyones de los dirijentes de muestra komunidad kon los reprezentantes del Governo. En 1992, dospues de los evenimientos de los 500 anyos de muestra ekzistensia en las tierras otomanas i turkas, la Komunidad Djudia i sus dirijentes tuvieron la posibilidad de tener relasiones mas frekuentas kon los responsavles del pais.

El sinyor Bensiyon Pinto, Presidente onorario de muestra komunidad reelmente djugo un rolo emportante en estas relasyones. I kreo ke los ke sigieron, izyeron los mizmos esforsos kon el o sin el para konservar el nivel de  estas relasyones.

Unas kuantas semanas antes, el Gran Rabino fue envitado a un pranso del primer ministro Davutoğlu. A este pranso todos los kapos relijiozos (todo modo de kristianos: Gregos, Asireanos, Ermenis i todos otros sektos del Kristianizmo) fueron envitados i tuvyeron la oportunidad de avlar, mizmo de demandar mizmo de kasharsen sovre los problemes ke estan bivyendo.

La semana pasada fue el boom de estas envitasyones i tres de muestros lideres fueron envitados a Ankara por el primer ministro Davutoğlu a la kapital de muestro pais. Muesto presidente İshak İbrahimzadeh; muestro amigo Adil Anjel, ke toma lugar en el Komite Egzekutivo i muestro editör del Şalom, İvo Molinas, eran envitados entre munchos lideres  kristianos. Durante esta resepsyon, el presidente İbrahimzade i el sinyor Molinas tuvyeron la oportunidad de avlar lo ke pensan demandando siertas rezolusyones a los problemes ke estamos bivyendo. Mi opinion es ke todos los dos reushieron a eksprimar sus ideas i tuvieron un sukseso bastante.

Esto reelmente muy kontente de ver estos amigos mas mansevos ke estan en la kavesa de muestra komunidad i ke son kapaches en este kampo. La komunidad Djudia durante su pasado i su istorya mizmo en dia de oy prefero a kesharsen de una manera mas pozitiva. La mizma noche siertos otros dirijantes de otras komunidades izieron sus kritikas de una manera mas fuerte ke no fue muncho aprovado. 

A la fin de la nochada el primer ministro Davutoğlu i su ayudante Bülent Arınç  tomando la palavra dieron repuesta a muestros amigos por las rezolusyones de estos problemes.

La semana pasada el prezidente de la Republika, en un diskorso en eksprimando sus ideas  sovre muestra Tora... Esta avla tuvo una reaksyon negativa en muestra komunidad. No se lo ke izieron muestros dirijentes i muestros Rabinos ma en el sit enternet del Prezidente avia para el dia de alhad una entrevista kon muestro prezidente İbrahimzadeh.

No se lo ke afita a la fin ma kero dizir ke oy en dia muestra komunidad de 17-18.000 almas tiene bastante relasyones para transmeter a los responsables de muestro paiz los problemes ke bivimos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın