Del Ladino En Estambol Oksidental?

Del Ladino En Estambol Oksidental?

El 08.02.2015 alhad demanyana, kaji 300 personas se aunaron en el salon de la sinagoga Neve-Shalom, por fyestar ‘El Dia Enternasyonal Del Ladino’ ke se realizo por la primera vez en Estambol.

A las onze de la demanyana, entrimos al salon, duzudeado kon una schena a la syedra, los instrumentos de musica a la derecha, i las siyas una allado de otra, ornadas kon tapones blankos, i todos saludandosen i avlando uno kon otro. Me izo grande plazer de ver esta unyon, esta solidaridad de muestra komunitad. Byen entendido ke estava del empisijo fista la fin el Presidente de muestra komunitad, İshak İbrahimzadeh. Malgrado ke no entyende el ladino i save muy pokos byervos, el mos onoro kon su prezensya.

En primero, Silvyo Ovadya, ke es el pilar de la komunitad; mos rezumo este dia del Ladino ke se fyesta en paises diferentes i la emportansa de pueder kontinuar a arrebivir esta lingua presyoza.

Karen Gerson Şarhon tomo la palavra para dar el program del dia entero, todo lo ke se va azer i para animar los partisipantes ampeso a kantar la kantika ‘Las Sardelas’ ke las palavras son eskritas por eya mizmo i por Süzet Herman.

Una kantika veramente muy sempatika, kon una muzika biva ke esta kedando en el meoyo.

No se kere dicho la savrozor de Karen kantando ‘Las Sardelas’ i baylando kon un ritmo ke todos mozotros ampesimos a tener tempo i a aplodisar.

Despues uvo una sorpreza ke mos amostraron los amantes de esta lingua, de todo el mundo, en dandomos a entender la egzaltasyon (coşku) ke tuvyeron de la organizasyon de este dia en Estambol. Mansevos i aedados dyeron sus opinyones (fikir) i oguraron una reushitad perfekta. Despues, myembros de muestra komunitad avlaron para dar sus ideas sovre la lingua.

Karen envito a la pintadora (ressam) konosida por todos mozotros Esti Saul ke avlo sovre Leopold Levy ke era un grande pintador djudyo fransez.

En 1936 lo envitaron a Estambol por lavorar en la ‘Akademiya de Güzel Sanatlar’. El kontinuo a ansenyar a los elevos durante 13 anyos ‘Lo ke es el Arte’, kualo es la pintura, ke no kale imitar a los otros. El peno para avrir una grande biblioteka en esta akademiya i kon el orden de Ataturk esta biblioteka se avyo. Atatürk disho a Leopold.L. ke; “Un puevlo sin Arte es komo se le arranko una de sus venas vital.”

Leopold Levy izo en 1947 por la Opera de Ankara, una gravura del Bosfor. El es konosido de una multitud de pinturas, el empresyonizmo fue su seksyon espesyal, estudyo los artes dekorativos i izo gravuras.

Despues, Karen mos konto la istorya de Güler Orgun, ke avla esta lingua kon muncha fasilitad, i ke es la ayudante del editor de la revista ‘Amaneser’. Güler tuvo una vida muy enteresante porke eya nasyo komo musulmana, despues se izo djudiya. El primer marido era djudyo, el sigundo era musulmano, la vida de sus granpapas i grandmamas, una vida kon kolores diversas.

Mario Levi el eskrivano famozo de muestra komunitad ke eskrivyo mas de dyes livros ke se traduizaron en 20 linguas, mizmo en chinezo ma non en ebreo.

El konto el sujeto de su livro de alkavo ‘Size Bir Pandispanya Yaptım.’ El profesör de Fransez, lavoro komo komersante, era un tyempo jurnalisto i izo diversos profesyones. Oy en dia da lesones en la universitad de Yeditepe.

Entonses la ora vinyendo a las una, oras de midi, Ceni Franko izo una demonstrasyon de kumidas tipikas djudias komo; kashkarikas, armi, köftikas de prasa, boyos de pimyenta, borekas de muez i otras kozas savrozas.

La meza aparejada por ‘La Casa Catering’ fue maraviyoza.

Todo preparado kon pasto i kon atansyon, se komyo kon plazer. Aviya; rulikos de berendjena kon aroz, avas kon ispinaka, armi, kaskarikas, dulsuryas i frutas.

Felisitasyones a los dirijentes de este ‘Catering’.

Despues de komer, era la ora de riyir i pasar un tyempo agradavle kon; Karen Şarhon, Süzet Herman i Anna Eskenazi.

Anna ke es lehliya preparo un teksto sovre la teknolojiya para riyir, burlar i kantar. Una partida de su teksto:

“Merki un Blackberry despues de lavorar 40 anyos, ke sona a kada momento, tomando fotos a kada paso, komunikando kon el facebook, ke puedes ver a ken keres i a ken no keres, i tenyendo haber ande estan i kualo estan merkando…

La tresera jenerasyon son los ke nasyeron despues del anyo 2000. Eyos son dependientes del internet, i de los telefonos intelijentes. Keremos adaptarmos a esta mueva jenerasyon.

Eyos lavoran para bivir, keren ser independentes, les gusta kritikar sin pardon …

Süzet Herman konto rekuerdos de su nona, komo se biviya akel tyempo…

Eya simpatika kon una avla dulse, avlando todo de kavesa, sin mirar al papel; esto es un grande talento!... Sus miradas intelijentes, sus djestos en kontando plazyo a toda la asistensya.

Karen Şarhon konto su chikes, su madre i padre, la vida familyal ke tuvo, la madre ke le dava muncho a komer, sus estudyos briyantes, i las diferensyas entre las jenerasyones del empisijo de 1920 fina oy 2015.

Las ideas ke trokaron, el kazamyento, la fuersa de la mujer estudyada i lavorando kon reushitad…

La jenerasyon de alkavo desde 1995 a 2015; los mansevos estudyando en paises diferentes, las ijas no se estan kazando, no keren gizar, dar uti, azer echos de kaza. Todo se troko, kale ke mozotros mos adaptemos a sus maneras de vida.

De muevo la kantika ‘Las Sardelas’ para espertarmos…. ‘PABLO Assuero’ el direktör de ‘Cervantes’ kon el Consul de Espanya avlaron de la proteksyon de los Sefaradis i las kondisyones para arrisivir el pasaporto espanyol kualo se deve de azer.

Karen arisivyo al Gran Rabino Rav İshak Haleva kon su mujer Recina en dizyendoles “Hoşgeldiniz” (Vinido bueno i klaro).

La orkestra ‘Ashamayim Stars’ izo un potburi de kantikas en ladino. Can Rodrig mansevo de 30 anyos ampeso a su avla en dizyendo ke; mozos somos myembros de la mizma famiya en el mundo entero. Dyo detalyos de los dialektos (lehçe) del djudeo-espanyol i disho ke “la abondansa de dialektos en una lingua amostra su rikeza”.

El Grande Rabino Rav Haleva mos onoro kon su prezensya i avlo en dizyendo: “Esto pesimisto del Espanyol ke se esta muryendo. Can; avla muy byen, a los mansevos kale ensenyarlos. Keridos mios; los mansevos peryeron una valor muy grande. Avlar el espanyol es una shans grande para debruyirmos en el mundo entero…”

Alberto Modiano izo una prezantasyon de su livro kon dias en el barkovizyon.

Verso la fin Jojo Kohen; avlo sovre ‘El Umor Djudio, i Shakayikas Djudias’. El disho ke el umor egziste en kada djudio. El Umor es la alma de los flakos kontra los fuertes.

El Umor djudyo no se burla de su enimigo.

El konto unas kuantas shakayikas para azermos riyir, i los partisipantes lo aplodisaron kon ardor.

Un konserto reushido de ‘Las Estreyikas’ kon İzzet Bana, i kantikas de ‘Los Pasharos’ fue el final de este dia yeno de aktivitades.

Remersyamos a los organizatores de este dia muy reushido; Silvyo Ovadya i Karen Şarhon i todos los ke lavoraron de alma i korason.

El Dyo ke mos ayege al anyo 2016 kon sanedad i kon todos djustos. Amen.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın