La ekspozisyon de ‘Joan Miro’ i el konser de ‘Romain Descharme’

Şeli GAON Judeo-Espanyol
29 Ocak 2015 Perşembe

La semana ultima tuvimos la okazyon de vijitar la ekspozisyon de ‘Joan Miro’ ke tuvo lugar en el muzeo famozo Sakıp Sabancı kon mi marido Meir.

Entremientes una envitasyon de un kolaborador de mi marido por la noche de djugeves ultimo, para un konser en el mizmo muzeo mos izo grande plazer.

Un pianisto konosido por las quatro partes del mundo; ‘Romain Descharmes’ un pianisto famozo Fransez, ke gano en 2006, el Premyo (ödül) de ser Primer en la kompetisyon  (yarışma) internasyonal de ‘Dublin’.

En primero vijitimos la ekspozisyon de ‘Joan Miro’ ke es nombrada ‘Las Mujeres, Los Pasharos, las Estreyas’. (Kadınlar, Kuşlar, Yıldızlar).

A parte de las pinturas, el izo munchas statuas.

La tema de sus pinturas es; la mujer, la luna, el sol, el grupo de estreyas (takımyıldızlar), el syelo, la tyerra (yeryüzü).

Allado de estas ovras emportantes, tuvo lugar en esta ekspozisyon tablos de akrilik, i statuas enteresantes, en todo 125 ovras. Unas kuantas ovras komo,  efektos personales (kişisel eşyalar), tapis, seramikes estan ekspozados por la primera vez en el mundo, en Turkiya en el muzeo Sakıp Sabancı.

Uno de los mas famozos tablos es: “La mujer kon chapeyo i la estreya.”

El disho por esta pintura: “Lo ke nombri komo mujer, no es la persona mizma;  eya es un universo (evren), un mundo”.

Otra pintura emportante; “La mujer i el pasharo”. Lo ke penso por esta ovra es; “En un tablo todo deve de ser homojen, komo un puerpo ande puedemos ver el braso, la mano, el pye ke son el ekilibro del puerpo.”

Miro nasyo en Barselona i estudyo en la eskola

‘Superyor de Artes Industriales i Bellas Artes’ (Güzel Sanatlar ve Endüstriyel Sanatlar Okulu). El es un pintor surrealisto (gerçeküstü), i un eskultor (heykeltraş) Katalan ke kreo ovras sin kuento (sayısız).

Despues de la ekspozisyon, vijitimos el muzeo de Sakıp Sabancı (z.l.); ke se puede dizir un palasyo moblado (döşenmiş) kon muncho guste (zevk) i fineza.

Las kamaretas, los salones delantre la vista spesyal del Bosfor, kon tapis grandes, pinturas famozas i vazos (vazo) grandes de un metro, duzudeados en una forma dos por dos (iki iki), vinidos de paizes diferentes del mundo.

Estava veramente muy enteresante.

Despues de su reushitad en Dublin;

‘Romain Descharmes’ ampeso a dar konseres en el mundo entero i fue konosido komo müzisyen internasyonal.

El termino el konservatorio de Paris komo primer i lo ke tyene es solamente 35 anyos.

En el anyo 2000, la reushitad internasyonal ke tuvo en la Almanya, kontinuo en 2003 en la Japonya, i aki en la kompetisyon internasyonal de piano en Hamamatsu el gano el premyo de; ‘Muzisyen Ekstraordinaryo’ i en 2004 otro premyo en la Italya. En 2005 en Shangay ‘Descharmes’ gano el ‘Premyo el mas Alto’, i en 2007 en la Fransya gano;

‘El mas Grande Premyo’ de la kompetisyon de la Evropa İnternasyonal.

‘Romain Descharmes’ es uno de los pianistos famozos  i konsiderado en Fransya, i el partaja la schena kon las orkestras; ‘Berlin Flarmoni’, ‘Shangay Flarmoni’… i munchas otras renomadas.

El toma schena en ‘Carnegie Hall’ en Newyork, ‘Wigmore Hall’ en Londra, en ‘Salle Cortot’ en Paris, i en munchos salones  internasyonales  konosidos por el mundo entero.

Esta envitado por dar konseres en los paises komo la Amerika, Kanada, Italya, Almanya, Meksiko, Japonya i diversos...

Fue un konsierto alavado, yeno de djente. Lo ke me sorprendyo (şaşırtmak) fue los mansevos i mansevas ke asistyeron a esta nochada.

Fue una nochada reushida kon personas civilizadas, kultivadas i kon karas limpyas…

Ay una oposizyon (karşıtlık) grande en este pais entre las personas, entre el puevlo kultivado i inyorente.

Ke el Dyo mos guadre keridos  lektores,  de las kozas ke no mos puedemos guadrar...