Bo

Despues ke meldimos en la perasha Vaera las syete yagas ke mando El Kriyador a Paro, i a Mistrayim, meldamos en la perasha ‘Bo’ las tres yagas ke mando El Kriyador a Mistrayim. I se kompletan las dyes yagas Eser Makot. El Kriyador les mando despues a la langosta ke baryo todo lo semprado. Despues les mando El Kriyador una fuerte, i espesa eskuridad ke turo tres diyas i tres noches de una manera ke los izo kevrantar muncho.

Syendo no se puedian menear kada uno de su luguar. Todos estos males fue suportando el kruel Paro en tal de estar en su kapricho i no mandar a los Cudyos de su tyera. Kuando se apezgava la fortaleza de la yaga  sovre el i sovre su puevlo, ya paresiya ke se iva ablandar su korason i ya prometiya de dar la libertad a los Cudyos. Apenas kalmava la yaga i teniya un poko repozo, tornava a su negro, i enduresiya su korason. De esta manera  suporto Paro, i todo su puevlo estos 9 terivles yagas.

Myentres ke todos los Cudyos, estando mismo mesklados kon los Ejipsyanos no teniyan ningun mal.

La dyezena yaga Makot Behorot no pudo suportar asta el kavo, i se le ablando un poko su korason despues de sufrir bastante ke todos los ijos mayores(Behorot) de los Ejipsiyanos sin diferensiya de çiko a grande, de prove a riko fin el ijo de Paro muryeron todos de una en la medya noche del 15 Nisan sigun lo amenazo Moshe Rabenu.

Fue forsado Paro de parte todo su puevlo de yamar en akel momento a Moshe i a Aaron i rogarles ke salyeron eyos i todos los Cudyos del Ejipto i ke rogaran por su vida.

En la medya noche del 15 Nisan, mando a dizir Paro a todo el puevlo Cudyo ke se topavan en la tyera de Goshen, ke eyos eran liberos i ke puediyan salir de su pais. I al punto los Cudyos ke ya estavan prontos esperando esta ora, se rekojeros todos kon prisa en el kartier Ramses, i la manyana i en 15 Nisan salyeron todos los Cudyos de el Ejipto kon grande koraje i alegriya despues de aver estado siyeftos en este pais 210 anyos.

 

 

La semana pasada okurre un error tekniko sovre la perasha de Vaera. La version korrekta de la perasha publikamos esta semana



Vaera

Despues ke estuvyeron Moshe i Aaron konversando kon el puevlo Yisrael i les dyeron a saver la desizyon del Dyo poderozo, fueron al palasyo de Paro por avizarle el komando del todo poderozo.

En akeyos tyempos no era fasil a kualon ke persona de entrar i topar kon Paro si ser otorizado. Pero Moshe Rabenu sirvyendose de su vara ke le apronto El Kriyador en el monte de Horev por ke aga kon eya todas los sinyales i maraviyas entro al palasyo sin lesensya de ninguno, i topandosen Moshe i Aaron en prezensa de Paro le avizan el komando del Dyo ke salte a su puevlo Yisrael del esklavaje i ke los mande alforiya.

Paro no tomo tan presto en konsiderasyon estas palavras de Moshe i Aaron, les dize ke los Cudyos estan muy floshos en sus lavoro, i por esto yo les metere un buen yugo ke no tengan tyempo de pensar la salidura de Ayifto.

Paro izo apezgar el yugo de su servisyo sovre el puevlo Cudyo kon un krueldad ke no se puede imajinar.

En el enterval de un anyo, mando el Dyo dyez yagas una mas fuerte ke otra a Mistrayim. Enprimero se trokaron las aguas del nilos en sangre, i muryeron los peshkados del riyo.Despues se muchigaron en el rio las ranas i salyendo despues de la agua kavzaron munchos danyos en la tyera. Despues de konkriyo en todo el Ejipto unos piojos de una manera muy feya i muy danyosa, mas despues arivo al Ejipto una mesklatina de unos animales krueles ke kevranteron muncho el publiko.

Despues uvo una mortaldad terivle en las kuatropeas ke izo muncho danyo. Una feya i muy negra sorna les vino a todos los Ejipsiyanos asta no pueder suportar. Despues uvo un buen pedrisko ke danyo todos los frutos del kampo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın