La alma del ke no es profesyonal

Keridos lektores. Oy en dia en todo modo de ovras (sinagogas, sentros para los menesteres relijiozos komo la kasherut, la Hevra Kadisha, klobes para los mansevos, asosyayones i fondasyones de ayudo; todo modo de organizasyon sosyal i kultural komo el muzeo, el semanario Şalom, el Sentro Sefaradi…) tienen de menester de dirijantes amatores o profesyonales ma ke lavoran kon la alma de profesyonal.

Ay mas de kuarenta i sinko anyos ke empesi a ser miembro i lavorar  en el Club Or Ahayim.  Era muy difisil de ser achetado para ser dirijente, i kada anyo kuando elijian los dirijentes teniyamos eleksyones i todos los ke kerian no eran achetados para ser kandidatos.

Oy en dia kreo empesando par los klobes para los mansevos en kada assosyasyon, fondasyon i organizasyon tenemos problemes de dirijentes. No kero dizir ke los dirijentes de oy no valen nada ma no es fasil de topar personas ke lavoran reelmente de korason. Ke sean amatores o profesyonales lo mas emportante es lavorar sin ser pushar.

Oy en dia tenemos eksepsiyones komo el Şalom ande lavora reelmente sesenta – setenta personas en el büro, en la teknika, en la publisidad, en la gazeta komo eskrivano/na, en la biblioteka, en la libreria… Unos kuantos dias antes del anyo muevo organizaron una nochada ande se topava  munchas personas kreo entre disiete i setenta i un anyo. No puedesh topar munchas ovras o organizasyones ke lavoran kon un ekipo formado de personas tan diferentes (de aedad, mizmo de ideas. I lavoran muy armonyozamente…)

Ay ventidos anyos ke partisipo a las reuniones del Konsilio de los Konsejeros del Gran Rabino (El  Konsilyo Laiko ke es la organisasyon la mas emportante ke da las desisiones sovre la komunita Judia). Oy en dia so uno de los mas viejos miembros ma no uno de los mas aedados. Kreo ke ay tres miembros mas viejos ke mi i los tres son mas mansevos. De ke esto tanto avlando de este sujeto? Puedeser porke malorozamente es muestra kulpa de no atirar los mansevos a este dover de tomar parte en la direksion de muestra komunidad. Una otra razon es ke la mueva jenerasyon komo preferaron de lavorar en kompanyias komersiales enternasyonales o de volum ancho no tienen tiempo para ayudar en lavoros sosyales o preferan de azer otras kozas komo spor.

No tenemos mas mansevos o muy pokos ke lavoran en el magazen del padre en Tahtakale o Mahmutpaşa (lugares ande avia sienes de botikas ke  azian komersio donde los posesores eran judyos.

Los individuos de mi  jenerasyon – unos kuantos anyos mas mansevos o mas aedados – reelmente fueron los gerreadores. I kombatyeron para muestra komunidad en kada kampo. Ma oy en dia estamos asperando los mansevos ke tomen muestros postos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın