El kokteyl de Matan Baseter

La semana ultima, alhad demanyana tuvimos grande plazer de asistir a la avyertura del mupak “Kosher” del “catering” de la Matan Baseter.

En una fragua mueva, muy grande, todos los mupakes tantos limpyos, estavan  briyando i golyendo al miskle.

Este dia fue organizado de la parte de los dirijentes de Matan-Baseter, de una manera perfekta.

Siguramente ke; el grande rabino Rav İsak Haleva estava envitado kon el presidente de muestra komunitad İshak İbrahimzadeh, Jojo Nasi, Moris Levi, los presidentes i los volontaryos de todas las organizasyones i assosyasyones  ke forman un aventador (yelpaze) en el entorno del grande rabinato (hahambaşılık) ke es el kapo (baş) de muestra komunitad.

Las volontaryas i volontaryos, munchos donatores, i grasyas al presidente aktual ‘Mordo Hazak’, ke ensistyo a los presidentes  de las periodes pasadas (geçmiş dönem) ke lavoraron de alma i korason para enalteser el nivel (seviye) de la organizasyon, los bushko kon telefon uno por uno para ke asisten a este dia emportante.

Veramente, mos izo grande plazer ke no se olvido de mozotros, ke aki era muestra primera kaza en la perioda ke lavorimos. Mersi muncho a todos los dirijentes de la Matan Baseter.

Eti Tastasa izo una avla partikolar en remersyando a todos los partisipantes, i envito el presidente Mordo Hazak.

Mordo Hazak, ampeso su avla en dando el senso de Matan Baseter.

“Matan Baseter; es ayudar en sekreto, para asegurar (güven altında olmak) el ekilibro entre los menesterozos ke estan pujando malorosamente de dia en dia.

Munchos mansevos ke estan peryendo sus echos i no estan puedyendo abasteser al nesesaryo (gereksinim) de su famiya, se estan adresando a muestra organizasyon para demandar ayudo. Malorosamente muestra komunitad se esta envyejesyendo de dia en dia, i munchas famiyas estan en la difikultad. Muestro buto es; de koryer i abasteser al menester de 800 personas ke tenemos en muestra responsabilitad, i aminguar sus problemes”.

Termino su avla en remersyando a todos los ke dyeron apoyo (destek) para vinir a estos dias.

Ceni Franko; la fondatrisa (kurucu) del catering; remersyo a todos ke lavoraron kon grande esforso (çaba) para reushir.

Prof. Dr. Mois Bahar kon su mujer Emel; dyeron un apoyo inkreivle en el punto de vista de la sanedad, los ospitales, los doktores, todo modo de egzamenes ke se izo todo kon sus kontroles. Este kuple se konsakro (adamak) a todas las personas ke tyenen menester de eyos.

El doktor en su avla disho ke; todos los esforsos de los volontaryos, tyenen una grande emportansa para la kontinuasyon de las organizasyones.

A la fin, los partisipantes kaminaron este edifisyo ke se izo kon grandes difikultades i muncho gaste, i a la fin, el kokteyl de la Casa de Barınyurt Catering ke aparejo una meza ekstraordinarya komo syempre.

Djugeves la noche tuvimos la shans de asistir a un konserto de “David Ezra Okonşar”, un artisto (sanatçı) ke nasyo en Estambol i izo sus estudyos de muzika en el konservatoryo de Ankara. En 1981 el tomo la diploma de “Premier Prix” del “Konservatoryo del Reynado de Brüksel” (Kraliyet Konservatuarı). En 1986 fue elijido (seçilmiş) entre mil elevos, grasyas a su talento (yetenek), para terminar komo primer las branshes de kompozisyon i de orkestrasyon de piano. El partisipo a munchas kompetisyones internasyonales i resivyo munchos premyos (ödül) en la Evropa i en Amerika. “Okonşar” es un kompozitor (besteci) ke produiza (üretmek) ovras muevas.

Okonşar es en mizmo tyempo eskrivano i müzikolog, i konose las linguas inglez i fransez komo su lingua maternal.

En el albüm de “Gershwin”, tyene lugar todas las ovras de piano del kompozitor.

En el program de djugeves aviya 10 kantikas de “Broadway” kon la organizasyon del kompozitor, i a la fin la adaptasyon de piano por D. E. Okonşar: ‘Rhapsody in Blue’ ovra de ‘Gerswin’.

‘Dr. Robert Schild’ fue el organizator de esta nochada reushida. Los detalyos ke mos dyo entre las kantikas, i su konosensya partikular sovre el arte de muzika aseguro una kayentor (sıcaklık) entre los partisipantes.

Syempre de mijor a mijor...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın