Una nochada yena de sorprezas

Una nochada yena de sorprezas

De vez en kuando me  vyene una inspirasyon (ilham) de eskrivir dos evenementos sovre el mizmo sujeto.

Lo ke es enteresante ez ke; la amor, la pasyon de los  20 anyos, no tyene dinguna diferensya de la amor de los 50 anyos. La amor ke briya en los ojos es la mizma i marea a la persona ke tyene la pasyon.

El 24.06 martes la noche estuvimos envitados a una boda ekstraordinarya i muy diferente en Neve-Shalom.

Una boda ande kuatro ijos, elmueras i inyetas kon inyetos mos arisivyeron en la puerta en dizyendo: “Seygaj los byenvenidos i vos remersyamos de vuestra prezensya”.

Bevyentas en el kokteyl fue sirvido kon muncha atansyon.

Esto era organizado por los ijos del Grande Rabino Rav İzak Haleva; a la okazyon de 50 anyos de kazamyento kon su kerida mujer Recina Haleva.

A las ocho i medya entrimos todos al kal para azer la minha i asperarlos. İ enfin ya arivaron, i kaminando a poko a poko; la muzika de kazar ampeso, i todos mos alevantimos para resivirlos i aplodisando (alkışlamak) kon grande entuzyasmo.

El Grande Rabino kon su Mujer se shashearon de ver esta toda djente i de una manera dinya (vakur) ampesaron a kaminar verso el talamon.

Todo ya estava pronto djusto komo una boda. En el talamon las inyetas kon los inyetos prontos a echar tallet estavan allado de la Hupa.

Rav Davit Sevi kon su boz de seda ampeso a la orasyon de kazamyento. El grande Rabino kon su mujer debasho de la hupa en el talamon, muy kontentes se kazaron kon grande alegriya. Despues las felisitasyones de su famiya, abashimos a Neve Shalom Kültür Merkezi para komer.

El salon ornado kon rozas, las mezas kon las siyas kon manteles blankos, toda la famiya, el presidente de la komunitad İshak İbrahimzadeh kon su mujer, dirijentes de la komunitad, amigos; todos los envitados tomaron sus lugares en las mezas.

Siguramente el komer savrozo i pastozo fue preparado por “Barınyurt”  komo syempre.

Todo estava prezantado komo una pintura (resim), di ke paresiya a un tablo.

Despues de komer, las fotos de manseves, fueron amostradas kon barkovizyon.

Amigos i amigas de la manseves avlaron en ogurando de fyestar los 75 anyos del kuple.

Recina Haleva es una mujer muy akorrida para  su famiya, muy kapache, porke no es fasil de engrandeser kuatro ijos i tantos inyetos i inyetas,  kon las envitasyones menesterozas del Grande Rabino.

Eya kon grande devuamyento (özveri), se sakrifiyo a la famiya para azer todo lo ke kale i para konformarse kada noche shabat, arekojer a esta famiya grande, dar a komer, abasteser a lo ke keren todos, i espesyalamente de pueder instalar (yerleştirmek) a todos para echarsen en kamas, u enbasho, es una grande abilitad (beceri).

El Grande Rabino İzak Haleva tyene una kerensya a los umanos (insan sevgisi), ke lo aserkan de las personas i todos se syenten muy repozados allado de  el. Es muy sensero (samimi), muy kerensyozo, kon los aedados, los mansevos i las kriyaturas. Todos lo keren muncho byen.

Es spiritual, sempatiko, konta munchas konsejas de la tora los shabat demanyanas ke aze derasha.

Meri Shaban kon su boz ermoza,  kanto  en espanyol, en turko i en ebreo i mos alegro a todos, durante la nochada ke fue muy reushida.

A la fin; trusheron  un gato (pasta) kon kandelas, i İzak Haleva kon “Rejin” vinyeron komo los novyos de antes 50 anyos, para amatar las kandelas i kortar la pasta.

Toda su famiya en el entorno de eyos,  se fotografyaron kon el famozo fotografo Alberto Modiano, ke es el fotografo konosido de muestra komunitad.

El 24.06 es el aniversaryo de kazamyento  de Lika-Silvyo Ovadya, kon Şeli- Meir Gaon en mizmo tyempo. Rav Nafi Haleva mos onoro en yamandomos a la shena, para amatar las kandelas de un sigundo gato.

Veramente mos izo grande plazer de fyestar kon todos este dia emportante para mozotros. El  fue muy delikado de pensar i alegrarmos.

Fue una nochada organizada, muy reushida kon los detalyos los mas chikos.

Kero felisitar a Nafi Haleva kon los tres ermanos, las mujerikas i las kriyaturas, de pensar a fyestar, i envitar a los keridos, para render orozos a sus madres i padres muy keridos.

Ke el Dyo mos ayege a fyestar los 75 anyos kon sanedad i felisidad (mutluluk), amen.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın