Una boda ekstraordinarya en villeurbanne

Una boda ekstraordinarya en villeurbanne

La semana ultima, una partida de muestra famiya, tuvo la okazyon de asistir a una boda en “Villeurbanne-Lyon” en “Fransya”. Fue una grande shans para mi de asistir a esta boda del ijo de mi primo (ke este en ganeden); porke aviya 24 anyos ke no me iva a Lyon.

Me fui ande mi tiyo ke es aedado i bive solo en su kaza.

Ke resivida ke fue! Veramente koza de ver despues de tantos anyos. Despues un poko, la mujer del ijo grande ke se aviya kazado antes dos anyos en Antakya; vino kon el bebe de un mez, muevo nasido. El bebe “İsak Kohen”; un chikitiko luzyo, entelijente, kon kaveyikos largos i kon pyezes boy de borekitas de komer.

 La primera noche komimos endjuntos, avlando, i akodrandomos de los anyos pasados ke bivimos en Estambol, de los rekuerdos de la chikes i manseves.

Al otro dia, el novyo “David” kon la novya “Lucile” vinyeron a vermos, muy aturvados i koryendo para pueder eskapar  todo los echos. Trusheron las bonbonyeras i mano kon mano las inchimos de bonbones i las aprontimos.

Al dia siguente (ertesi gün), la famiya de Lucile kaji 12 personas arivaron  de Paris a Lyon, i sej personas de muestra famiya se enstalaron en el mizmo otel en Villeurbanne muy serka de la kaza de mi tiyo.

A la nochada;  la madre del novyo envito a toda la famiya a su kaza para konosermos antes de la boda.

Fue una nochada reushida i entima.

Lyon no es una sivdad muy grande. Antes un dia de la boda mos fuimos a kaminar el vyejo Lyon; kazas vyejas, magazenes enteresantes, kalejikas estrechas ma atraktivas (çekici) i de kolores diferentes, kon restorantes tipikos.

La vedrura en todo modo de kaleja, los arvoles, las flores a los bodres de las ventanas, la djente ospitalyera (misafirperver) ke mos arisivyeron kon grande entuzyasmo.

En la sivdad mueva, apartamentos muevos, kaminos anchos entornados de parkos yenos de arvoles, i rozas, todo ordenado i muy limpyo. La populasyon muy respektuoza, la sirkulasyon de las arabas, i de las personas kon un orden ekstraordinaryo. En el enterval de unos kuantos dias ke pasimos aya, no vide una polisiya de trafiko, ni las luzes del trafiko, ni sinti un chuflete.

Todos los envitados ke vinyeron de las diferentes sivdades de Fransya; komo Paris, Grenoble, Annecy, i de otros paises komo Lozan, Amerika, Singapur i Estambol se toparon en la Sinagoga “Keren Or” de Lyon, a las dos de midi alhad el ocho junio.

La sinagoga Keren Or, es una chica sinagoga reformista; kayente, grasyoza, i muy entima.

Los novyos ordenaron todo el kal kon rozas en todas las siyas, la hupa, i enriva de kada siya aviya unos papeles para ke la famiya pueda seguir (takip etmek) la seremoniya de la boda, kon las orasyones i las kantikas.

El “Rabino Tom Cohen”  amerikano, vino de Paris, ombre muy spiritual i muy sempatiko, avlando el fransez kon el aksan  amerikano.

La muzika ampeso i el Rabino kon su boz de seda ampeso a las orasyones. El novyo kon su tallet en el braso de su madre entro a la “Houppa” i de detras la novya luzya, kon kara riyendo entro kon su padre. El padre la konfiyo al novyo i se asento afuera de la Houppa.

La sinagoga tanto chica ke aviya debasho la Houppa, solamente  dos siyas para los novyos i el Rabino, i la famiya kon amigos asentados en el entorno.

Los mansevos en pyes de detras suivando kon muncho entereso esta boda de sus amigos.

Despues; el Hatan kon la Kala trokaron los aniyos en dizyendo ke asigun la ley de Moise i de Israel son aunados  i sanktifiados el uno al otro i bevyeron de la kupa de kidush un poko de vino.

El Rabino antes de meldar la Ketouba; izo una avla  enteresante en dizyendo  a los kazados ke; “esta houppa es vuestra primera kaza”.

“Esta kaza no tyene paredes i se puede despareserse kon una luvya fuerte u una tempesta.

Es vozotros ke vaj a kreer el nido de una famiya aki, kon vuestra kerensya, kon el entendimyento (anlayış), kon respekto. Vaj a konstruisir las paredes, i vaj a azer de vuestra kaza una guerta kon las frutas; ke son los ijos i vaj a ermozear (güzelleştirmek) esta guerta kon la tolerensya i el esforso para toda la vida”.

En meldando la Ketouba; repeto los doveres (görev) del uno i del otro. A la fin “David la tomo a Lucile” debasho el tallet; para sembolizar el nido ke van a konstruisir.

El Rabino incho un sigundo vazo de vino i empeso la orasyon de “Cheva Berakhoth”. İ a la fin el novyo rompyo el vazo kon su pye i todos los envitados gritaron “Mazal Tov” ke kere dizir;  ke syempre tengan  shans buena en la vida.

El Rabino kon su boz maraviyoza ampeso a kantar;

“Siman Tov Mazal Tov, Ose Shalom, Od Yishama” i otras kantikas en akompanyadolo i todos en un rango felisitaron los muevos kazados.

Fue una boda diferente para mozotros, ombres i mujeres uno allado de otro, kon muncha alegriya, semplisitad,  i modestiya, sin hadras ni baranas.

Se estava vyendo la kerensya verdadera de los partisipantes.

Fotografiyas debasho la houppa, todo djusto.

Di ke  paresiyan a pasharos bolando de felisitad (mutluluk).

Kaliya ver el entuzyasmo (coşku) de las 150 personas ke asistyeron a la boda!...

Mos fuimos despues la boda; a un lugar aryento de rozas i vedruras kon una pisina, un lugar elegante.

Un tyempo kayente akompanyado de un coctail riko. Konosidos de diferentes paises, sivdades, famiya, amigos, mansevos, todos kontentes riyendo, avlando kon alegriya.

Para komer entrimos aryento, las mezas byen ordenadas kon rozas en medyo. Kuando ampeso la muzika; “Lucile i David” entraron kon kantikas hebraikas, i alevantaron a todos para baylar, i azer horas. Djusto una boda djudiya…

Kuando empesimos a komer, los dos salyeron en medyo i baylaron muy grasyozos.

Sus amigos i la famiya estavan dando una felisitad i una atmosfera kayente. Todo byen organizado de la parte de los novyos, ke vinyeron solo por una semana a Lyon.

Estan lavorando en Singapur i estan bivyendo aya por oras.

Pasimos una boda inolvidavle  en esta sivdad, entornados de toda muestra famiya; lo mas emportante en la vida, i chikos i grandes kon una relasyon yena de  kerensya.

Eyos ke tengan byen, i mozotros tambyen, ke esten orozos fina la fin de sus vidas.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın