Emor

Ino esbivles mi nombre Santo, i sere santifikado entre los ijos de İsrael. Yo so El Dyo ke vos santefiko. Ansi meldamos en uno de los versetos de la perasha Emor. Este verseto nos da a entender una enkomendansa muy enportante. El puevlo Djudyo esta enkomendado de santefikar a El Kriyador. Komo esta eskrito en la Tora i sere santefikado adriento de el puevlo Djudyo. İ estamos akavidados de no esbivlarlo. Devemos bivir por santefikar el nombre grande de el Shem Yitbarah.

En ke manera puedemos syempre santefikar el nombre de Dyos? Si puedemos apartarmos de pekar, i azer las enkomendansas de El Kriyador, sin esperar ningun entereso, si no por su nombre el grande. Komo vemos a Yosef Atsadik ke pudo fuyirse syempre de no pekar.

La persona si auza a si mismo de avlar kon todo modo de persona kon repozo, de pensar syempre lo custo, de konportarse kon la cente kon kara riyente, de no ser pletozo, de konportarse en su negosyo custa, syempre se alesha de pekado.

El no pekar, i azer las enkomendansas de El Kriyador, la persona lo deve de azer a nombre de Dyos. Este akto es santefikar a El Kriyador. Todo lo bueno ke aze el ombre en la vida deve azerlo a nombre de el Kriyador i no por otra entisyon.

El ombre en la vida deve ser custo, prinismo de amar a toda cente, ser umilde. Ansi, a una persona semejante la cente lo toman por model, i santefika el nombre de El Kriyador.

Una persona semejante asemeja a una luz ke arelumbra el kamino de muncha cente. Ke sus kaminos syempre son derechos, i su vida pasa en pas. Estas kualidades azen a la persona aserkar a la Tora. Kada myembro i myembro de su kuerpo es una mitsva enkomendansa de kompleta las 613 mitsvot.

La vida de santefikar el nombre grande de El Kriyador es una vida santa apropyada para El Kriyador.  İ tambien bivir por el nombre Santo de El Kriyador.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın