La soledad en la vejez

La soledad en la vejez

En los tres anyos ultimos ke me esto okupando de los aedados solos; los aedados ke no tyenen ijos, ijas, maridos, mujeres i kaji dinguna famiya; me apersivi ke la soledad esta una problema muy difisil, mas difisil ke la vejez. Una konsiderasyon superfisyal de la vejez mos puede yevar a pensar; ke todos los aedados se syenten solos i abandonados.

Se trata de una eksperyensya desagradavle, asosyada a un hal de alma (ruh hali) emosyonal, nervositad, sentimyento de tristeza, kreensyas de ser dezechado…

La vejez es un momento de la vida ande la soledad nase. Esta etapa de la vida va ser akompanyada de una suksesyon de pedridas, komo el echo del ombre, el statu sosyal, unas kapasitades fizikas ke fasilitan la eksperyensya de la soledad.

Ay personas aktivas, de edad 70 por ariva ke se okupan de iyir a kursos i aktivitades diferentes. Antes aviya kedar en kaza i vijitar paryentes, djugar kartikas.

Ay ombres kapaches ke pueden kontinuar sus vidas despues la muerte de sus mujeres. Ay entonses otros, ke se deshan i se envyejesen porke no keren ver a dingunos, i despues las hazinuras komo depresyon, u otras….

Los doktores dizen ke la soledad no es bueno para la salud mental, porke la soledad traye la depresyon, la anksyetad i la falta (eksiklik) de la valor por si (kendine değer verme). Los psikologos dizen ke la soledad tyene una emportansa primordiyal enriva la salud.

La soledad es una de las problemas el mas emportante en la vejez. La kapachitad de los aedados para kombatir la soledad en la vejez, esta relasyonada kon su kapachitad para azer frente a la pedrida. Las personas ke se syenten solas, tyenen difikultades para mantener las relasyones sosyales i la kapachitad de resolver los problemes.

Si agora mozotros ayudamos a los aedados, i prokuramos lo ke es menester para eyos, dechamos una erensya (miras) a muestros ijos, para ke kuando vyene el momento, ke agan lo mizmo kon mozotros.

Lo ke se deve de azer para preparar la vejez; lo mijor de todo es: aplikar un stil de vida saludable en el ke se toma en kuento:

 La alimantasyon balansada, evitando de konsumir los karbonidrates i lo ke es yagli.

 Bever muncha agua entrel dia.

 No utilizar alkol, bevyentas i sigara.

 Azer egzersisyos fizikos kada dia a lo menos 20 puntos de kaminar por egzempyo.

 Durmir 8 oras kada noche.

 Estar syempre optimisto i ver todo de la buena parte.

 Evitar i kontrolar las situasyones de stres i depresyones.

 Akseptar kon pasensya los problemes de la salud ke se prezenta.

Mujeres i ombres se syenten enkapaches de mantener relasyones bazadas en la konfiensa i este modo kreen frontyeras (sınır) entre eyos.

Kuando la soledad es dezeada no ay nada, ma la persona es sosyal naturalamente, kere amigos, preokupasyones para tener una vida kon felisitad i para pueder suportar las difikultades de kadal dia.

La pedrita es irramplasable, ma no deve de ser irreparable.

El sentimyento de soledad es una situasyon ke no es forsamente mala, i ke es posible de transformarla en un espasyo de refleksyon para konosermos a fondo, i enkontrar senseramente muestra idantitad (kimlik).

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın