Evenementos en muestra komunitad

Evenementos en  muestra komunitad

Antes dyes dias “Fortüne İzak PİNHAS” vijitaron Estambol i mos alegraron de sus prezensyas.

İzak Pinhas de ocho anyos endelantre empeso a lavorar porke teniya una vida muy difisil.

En el empisijo de 1950, se fue a Israel, i aya izo i aprovo munchos echos diferentes. Entremientes vino a Estambol, i se rankontro kon Fortüne, la kijo byen i se kazaron.

Oy en dia  estan lavorando endjuntos en una mandra ke posedan para azer kezos kon la marka “Pinhas”.

Tyenen un korason de oro i azen munchas donasyones para los mansevos ke puedan estudyar, porke eyos no puidyeron, no tuvyeron esta shans.

Los grandes donatores “Fortüne İzak Pinhas fondaron una eskola en Çorlu de mil elevos. Kuando vyenen a Estambol, vijitan sus eskolas, ke el direktor, los profesores i todos los elevos los arisiven kon muncha amistad.

Estuvyeron envitados por el Grande Rabino Rav. İzak Haleva, se renkontraron kon el Presidente de muestra komunitad “İsak İbrahimzadeh”, i kon los dirijentes diferentes i tuvyeron la okazyon de vijitarlos.

Ay kaji un anyo ke tuve la shans de konoserlos i azer amigable kon eyos.

Ke el Dyo les de muncho bueno por los ayudos ke estan azyendo a muestra komunitad.

Fue un grande plazer para todos mozotros de verlos sanos, aktivos i alegres.

A la fin del mez ultimo los “Maccabiates” se organizo en la Tyerra Santa. 12.000 esportivos (sporcu)  de 72 paises diferentes, entre estos 70 mansevos de la Turkiya tuvyeron la okazyon de partisipar a estas kompetisyones (yarışma).

Uno de los evenementos muevo tuvo lugar en el 20.7.2013 en Yıldırımspor en la fondasyon (tesis) de Büyükada. Los partisipantes de toda la komunitad pasaron una nochada reushida debasho el techo de las dos organizasyones  Yıldırımspor i Dostluk Yurdu Derneği ke se aunaron para syempre.

Shans buena a los dirijentes de esta mueva formasyon ke fue un paso para mostrar a todos los volontaryos de diferentes assosyasyones (kurum) , ke se puede lavorar endjuntos kon felisitad, i kon entuzyasmo.

Otro evenemento emportante; las volontaryas del azilo İhtiyarlar Yurdu i Barınyurt, organizaron un dia inolvidavle en la isla de “Sedef”.

Fue un dia reushido seyga sovre la promesa ke se dyeron para el lavoro ke van a akomplisar endjuntos sovre los aedados, seyga la amistad entre eyos para pueder kolaborar fasilmente las unas kon las otras.

Finalmente el dia fabuloso de “Golden Age.

“Golden Age” es una organizasyon ke tyene mas de 400 partisipantes. La presidente “Lida Sarfati” i su ekipa, lavoran de alma i korason, kon una ardor i una amistad eksepsyonal.

Organizaron un paseo de barka (tekne gezisi) inolvidavle para todos los ke asistyeron. El komer, el bever, los tratamyentos (ikram), el kantador ke kanto las kantikas konosidas les dyo una shans de pasar un dia maraviyozo.

 Keridos lektores; estos todos evenementos mos estan mostrando, ke munchos volontaryos i profesyonales de muestra komunitad estan lavorando kon una veluntad (istek) grande para pueder kontinuar el djudaismo entre los mansevos, en ayudando a los chikos, mansevos, aedados, a los hazinos i menesterozos.

Kon korason bueno, i pensando al den frente muestro Presidente “İsak İbrahimzadeh” esta azyendo unos atakos (atılım)  difisiles en dando muncha emportansa a las ideas de los mansevos, en sintyendolos i tomando en konsiderasyon lo ke estan pensando para la kontinuasyon de los djudyos en este pais.

El Dyo ke les de muncho bueno, muncha fuersa i pasensya, para puder luchar kon todos los problemes.

“AZLAHA İ BERAHA”.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın