El folklor de “Yıldırımspor”

El folklor de “Yıldırımspor”

“Yıldırımspor” es una asosyasyon ke arekoje los mansevos i mansevas djudios i aze ovras i aktivitades de spor, kulturales; komo teatros, paseos, partis para adjuntar los covenes en entegrandolos a estas aktivitades. Esta asosyasyon es konosida sovre todo; en el espasyo del spor i del folklor.

Kaji kada anyo, aktores i aktrisas de todo modo de edad, azen una demonstrasyon (gösteri) de folklor, i kada dos anyos los mansevos ganan premyos (ödül) emportantes en los “Makabiates” ke se organizan en paises diferentes del mundo entero.

Djugeves pasado, partisipi a una demonstrasyon de folklor en la eskola “Ulus Musevi Lisesi” organizada por Yıldırım spor.

El salon estava yeno, no aviya un lugar vaziyo.

Los volontaryos ke lavoran en esta organizasyon; lavoran de aryento del korason i kon muncha amor, ardor, pasyon (tutku) i kerensya; i esta ambisyon de reushir, kon la konfiensa ke tyenen; vensen (yenmek) todas las difikultades.

El nombre del folklor “ŞEVET” ke fue muy reushido; es una organizasyon muy grande de

 150  mansevos i mansevas de edad 9 a 22. Este grupo lavoro kon un ritmo (tempo) kondensado (yoğun) mezes i mezes.

Avram, Yitshak, Yaakov i sus ijos…..

Los trivos (kabile) ke son konosidos komo los padres del djudaismo; Reuven, Şimon, Levi, Yehuda, Yisahar, Zevulun, Dan, Naftali, Gad, Aşer, Binyamin, Yosef i sus dos ijos Efrayim kon Menase.

Los 12 trivos determinaron (belirlemek) partikolaridades diferentes en el djudaismo mizmo ke teniyan kolores, semboles i misyones diferentes; estas diferensyas los auno.

Los mansevos kon este folklor de 15 bayles, mos mostraron todo lo ke mos sinyifika estos 12 trivos.

Los 12 trivos (Şevet) son la baza del soy djudyo, kon este folklor mos mostraron la armoniya, la enerjiya i el entuzyasmo djudyo.

YILDIRIMSPOR krea projektos grandes, i kada anyo, uno mijor de otro.

Para enalteser el nivel de la asosyasyom, los volontaryos, estan pensando i se estan kreyendo ke kale azer estas aktivitades para detener los mansevos endjuntos, i mozotros; la komunita djudiya devemos de dar apoyo materyalamente i moralmente.

Komo de talento (yetenek) del mas chiko al mas grande!...

Toda la muzika muy sentimental, el dirijir este folklor, el dekor, los kostumes, las luzes, el makyaj, el livro ke se dyo a todos los ke partisiparon…

Veramente, yo penso ke esto es un lavoro de lokos.

Arekojer a tantos chikos, grandes, ijikos, ijikas, kriyaturas, mansevos, ambezarles a baylar kon pasos diferentes, penar un anyo; azer provas en dias i oras diferentes, porke todos estan estudyando u lavorando.

Entremientes kero felisitar a las dos profesoras del grupo Estreyas; “Esra LEVİ” kon “Roksi YAFET”, ke kon sus pasensyas i ardor del lavoro parvinyeron a esta demonstrasyon, i a todas las dirijentes de los grupos diferentes, los koreografes, el aranjor, el direktor de la muzika, los kostumes, las luzes i los ke lavoran i dan apoyo (destek) de detras de la shena, todos los ke baylaron kon una grasya spesyal i el presidente

“Moris FERMAN” ke izo una avla sovre “Yıldırımspor” ke esta fyestando este anyo sus 50 anyos de su fondasyon.

A la fin mas de 600 personas aplodisando, felisitando del mas chiko al mas grande.

Estava ekstraordinaryo. Syempre de mijor a mijor.

Felisitasyones; a todos los dirijentes del Yıldırım; de tener la veluntad de krear estos projektos, para pueder detener la manseves djudiya entre eyos i para evitar la asimilasyon!.....

La amistad ke tenej entre vozotros, ke puje de dia en dia para motivar i adelantar vuestra organizasyon kon munchas reushitades, i kon la mueva formasyon ke vaj a tener kon el “Dostluk” endjuntos!...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın