La alegria del empisijo del enverano

Şeli GAON Judeo-Espanyol
29 Mayıs 2013 Çarşamba

El tyempo ya se kayento, la semana vinidera las eskolas ya se van a serrarsen para las vakansas.

El enverano es una sezon ke se bive kon muncho gusto i alegria despues de la primavera. Los dias se alargan, las noches se akurtan, la natura es yena de munchas kolores diferentes, se oye kantar los pasharos, las yervas se engrandesen, las flores enfloresen en los kampos, i las personas se syenten mas orozos de todo modo de evenemento, porke esta sezon plaze a todos.

Munchos de mozotros se van a las islas, munchos viajan, i los ke se kedan en la sivdad, se van a la mar, todo el tyempo pasa afuera, en las kayes...

Se ampesa a vender las frutas del enverano ke son; las serezas, uvas, kayisis, avramilas, moras i otras.

El enverano arekayenta la persona. La natura se aribive; la kolor de las vedruras i  del syelo, la mar, todo el entorno yeno de kolores bivas, ke alegran a la persona i se deviene mas positivos, i mas optimistos.

La semana ultima, estuvimos envitados ande muestros amigos entimos en la isla Büyükada.

Veramente estamos bivyendo en un pais maraviyozo yeno de ermozuras natural, ma no savemos la valor de esta rikeza.

Las personas pueden estar orozos kon chikos plazeres en la vida. Esto depende del karakter de la persona.

Arivimos a sus kazas i mos asentimos un poko para eskansarmos. En la tarasa ke tyenen en frente de la vista de la mar, el panorama maraviyozo, el sol i las luzes de las islas estava koza de ver...

Komimos, bevimos, avlimos, meldimos gazetas i mos repozimos. El aver limpyo mos ayudo a durmirmos.

Fuyir de la sivdad kanseryoza i muy reboltoneyoza fue para mozotros un grande trokamyento.

Tener amigos buenos es un trezoro en la vida.

Yo penso ke; partajar todo modo de evenementos kon los ke mos sintimos serkanos, komo la famiya, ermanos, u amigos mos fasilita las difikultades de la vida.

Tener en el entorno munchas personas komo amigos, no kere dizir veramente ke todos son sinseros, i la amistad ke tyenen es vinido del interyor.

El amigo prinsipal es; el ke syente todos los evenementos orozos komo los akontesimyentos negros ke pueden trokar la vida de la persona en un punto, es el ke da moral al den frente, es el ke syente una amor, una fidelita sin fin i sin selo, i una sensibilidad para pueder eksplikar sus sentimyentos ke vyenen de aryento de su korason sin ideas malas.

El amigo sinsero es ; el ke da apoyo en los dias de difikultades al den frente, i esta atitud, este komporto aribive a la persona.

Yo penso ke; una persona tyene doz u trez amigos ke puede veramente partajar todo lo ke kere. Esto es una ermandad para mi. Kerer byen komo ermano al den frente es un efekto muy emportante, i da una moralita a la persona.

Todos se pueden atristar a la pena, a la ansya de un amigo, esto es lo mas fasil. Lo mas emportante es de gustarse i de alegrarse a la reushita de un amigo. Este fakto mostra el karakter rezyo de la persona.

La amistad, el amigable sinsero; es una fuente de agua en el deserto.