Alüminyum Hurda Geri Dönüşüm

La verdadera felisidad -1

Kuentos i Leyendas nasidas del fondo de la “Alma Djudia” vinyeron asta muestros diyas, en pasando por el “Tunel” de los anyos” i de la “İstoria”. Unos fueron tomados de los ansyanos “Livros Santos” i otros se transmetyeron “tradisyonalmente”, de jenerasyon en jenerasyon en el seno de la “Famiya”, todo en konservando la ekspresyon pura i naiva. El prezente Kuento es uno de estos…

La verdadera felisidad -1

El profeta Eliau Anavı i su dishiplo, estan viyajando a traverso el pais de Israel… Estan perkurando de azer achetar la egzistensya de un uniko KRIADOR, a los ke estan en idolatria… Ven en un kampo, un ombre lavorando la tyerra, kontinualmente murmureando i chapteando las vakas. Ni la komida, ni el vino ke le trusheron su madre i su mujer no estan pudyendo reushir a meterlo de buena umor. Eliau, ke desde un buen momento lo estava observando, le demando: “Porke tala mutra? Tala sanya? Tyenes una famiya kerensyoza i la komida no te manka. Porke no estas orozo?”

“Komo puedo ser orozo syendo ke so ovligado de lavorar diya entero, kuando otros biven gozando de la vıda? Maldicho seya el momento kuando muestros primeros avuelos gostaron el fruto defendido. Adam no iva sintir a Hava i entonses no ivamos a ser arrondjados del  GAANEDEN. Yo si fuera  al lugar de Adam, no avriya  sintido mi mujer.”…

I en esto, la mujer del agrikultor, adjusto ke eya nunka se deshariya sombayer por nada, komo fue Hava por la kulevra. A su torno, la madre aedada tomo la palavra:

“Estash avlando komo dos inyorentes. No ay, no avra sovre la tyerra, una persona ke no peko. İ vozotros tambyen, vos ivash a komportar de la mizma manera, si la okazyon se prezentava. No devesh kritikar la djente”.

Eliau, en silensyo, sintyo la nikochera i le disho: “Djuzgates kon induljensya la flakeza umana aprovechandote de tus eksperyensas. I eyos tambyen van a tener okazyon de prevar si son kapavles de rezistir a kualkyer sombayimyento”. I, sovre estas palavras el “Profeta” se alesho, djuntos kon su dishiplo.

Uvo un momento de silensyo i despues de este momento de kayades, la madre disho ke el ajeno deviya ser un savyo, i no un  simple mortal. El ijo respondyo kon ironiya, ke era porke la alavo ke estava pensando esta manera. Adjustando, el ijo disho ke el ajeno no teniya derecho de djuzgarlos. La madre le konsejo a su ijo  de kalmarse: 

“El ombre por siguro no teniya negra entisyon en dizyendo akeyas palavras. A la kontra se komporto komo un buen amigo, syendo ke mos izo konoser muestras faltas. El ijo no respondyo, empeso a lavorar kon mas muncha sanya. Apenas aviya empesado a kavakar la tyerra, vido una kashika de fyerro, i otra una i otruna  tresera. Yamo a las dos damas ke ya estavan empesando a aleshesarsen. Les amostro lo ke topo. Kon dfikultad, reusheron a meldar ensima la primera kashika: “LA PERSONA KE ME VA AVRIR, VA SER MUY RİKA”!

Alora, la madre repeto ke el ajeno era un embiyado de los sielos, para darles muncho bueno i  siguro ke aviya un trezoro ayi. El arador avyo la kasha i se eksklamo: “Mirad las piesas de plata!.. Es el Sielo ke mos mando esta rikeza! Madre, el ajeno era un azardo i nada mas. Me va azer una ermoza kazika, merkar un esklavo i va bivir sin ansya”…“I Yo,”disho su mujer, “Kero ermozas vestimyentas i una esklava”.

Tomando la sigunda kashika, mas pezgada ke la primera, meldaron: “SI PENSAS KE EL ORO TE DARA FELISIDAD, AVRE ESTA KASHA”. “Ke pregunta!. Siguro ke va ser muy riko, poderozo i orozo!” disho el mansevo… 

(Fin de la primera partida) 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın